Tedbirde qırımtatar Meclis reisi Refat Çubarov, reis muavini İlmi Umerov, Qırımtatar resurs merkeziniñ reisi, qırımtatar Meclisiniñ çetel işler ve huquq meseleleri boyunca idare başı Eskender Bairyev, Meclis azaları Riza Şevqiyev, Gayana Yüksel, halq deputatları Artur Gerasimov, Ahtem Çiygöz ve Çehiya dipkorpusnıñ hadimleri iştirak ettiler.
Mükãfatnı Ukrainada Çehiya elçisi Radek Matula taqdim etip, qırımtatar lideriniñ Çehiya tarihına qoşqan büyük issesini de qayd etti. Mustafa cemilev, öz nevbetinde elçige minnetdarlıq bildirip, işbu mukãfat Qırım işğali unutılmağanı ve bir kün mıtlaq adalet yeñecegini isbatlağanını bildirdi.
Qırım resurs merkezi Mustafa Cemilevni yañı mükãfatnen hayırlay. Mezkür nişan ile Çehiya Çetel işler nazirligi Mustafa Cemilevniñ 1968 senesi Çehoslovakiyanıñ işğaline köstergen mevamına, 2014-2021 seneleri tutqan rolüne qıymet kesmeknen bir sırada, zemane şaraitlerde qırımtatar halqınıñ tarafdarı olğanını numayış etti.
QRM Mustafa Cemilevge qaviy sağlıq, sabır, vatandaşlarımıznıñ haqlarını qorçalav ve Qırımnı qaytaruvı oğrundaki küreşte büyük irade tiley.