Vatandaşlarımıznı taqip etken, Rustem Emirüseinovnı, Arsen Abhairovnı ve Eskender Abdulganiyevni malüm etken RF areketleri – arbiy cinayettir, bu cinayette iştirak etken Rusiye akimiyetiniñ ve işğalci memuriyetiniñ er bir vekili ertemi, keçmi mesüliyetke çekilecektir. Bügünde-bügün Ukraina işbu cinayetlerniñ qayd etilmesi, tafsilâtlı şekilde yazılması ve taqiq etilmesi içün qolundan kelgenini yapmaqta. Vaqtınca işğal etilgen Qırım yarımadasında insan aqları, tamır qırımtatar halqınıñ aqları kütleviy şekilde bozulğanı aqqında bütün dünya bilmeli'', – dep haber etile Facebook saifesindeki bildirüvde.
Hatırlatamız, 2019 senesi kiçik ayınıñ 14-de Rusiye quvetçileri Qurman rayonındaki Büyük Onlar qasabasında qırımtatarlarnıñ evlerinde nevbetteki tintüvler keçirdiler. Üç qırımtatarnı yaqalap FSB idaresine alıp kettiler. Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlap olarğa qarşı cinaiy davalarnı açtılar.
Kiçik aynıñ 15-de Kiyev rayon «mahkemesi», tintüvden soñ qırımtatarlar – Eskender Abdulganiyev, Rustem Emirüseinov ve Arsen Abhairovnı Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlap apiske aldı.
Boş aynıñ 3-de, Rostov-na-Donu şeerindeki Cenübiy okrugınıñ arbiy mahkemesi Qurmandaki «Hizb ut-Tahrir» davasınıñ iştirakçilerine ükümler çıqardı. Rustem Emirüseinov 17 yılğa, Arsen Abhairov 13 yılğa, Eskender Abdulganiyev ise 12 yılğa maküm etildi. Siyasiy mabuslar birinci eki yılnı apishanede keçirmeliler.