Ukrainanı temsil etken maruzacı Anton Korineviç, Rusiye Avropada havfsızlıq ve işbirlik teşkilâtınıñ ve halqara uquqnıñ temelli qaidelerni bozğanını qayd etti. Tecavuziy memleket Qırım Muhtar Cumhuriyeti ve Aqyarnı işğal etip, yarımada ve yantayğan hudud suvlarını askeriyleştirmege devam ete.
"Ukraina temsilcisi, Rusiye halqara deñiz uquqnı bozaraq, çeşit sebepler tapıp Azaq-Qara deñiz bölgesinde gemiler qatnavına mania ola, dep qayd etti. Azaq deñiziniñ şiddetli askeriyleştirilüvi devam ete. Rusiyeniñ tecavuziy siyaseti tek Ukraina ve Qara deñiz bölgesiniñ memleketlerine degil, daa keniş bölge içün menfiy aqibetlerniñ sebebidir", – denile haberde.
Oturışta eyetler, Azaq-Qara deñiz bölgesinde ve onıñ tışında çatışuvlar sebebinden telükeli vaziyet peyda olğanı munasebetinen raatsızlıqnı ifadelediler. Halqara uquq, mustaqillik, hudud bütünligi, Birleşken Milletler deñiz uquqı konventsiyasınıñ serbest gemiler qatnavı qısmınıñ qaidelerine riayet etüv Qara deñiz bölgesinde havfsızlıq ve işbirlikni ğayrıdan tiklemek içün pek müimdir. Rusiyeniñ Ukraina ve Gürcistanğa qarşı cinaiy areketleri şu bölgede havfsızlıq ve işbirlik vaziyetine menfiy şekilde tesir eteler.