«2019 senesi fevralden berli tek endi, 2020 senesi mart ayında maña aqayımnen qısqa müddetli körüşme berildi. Körüşmemiz cam ve demir parmaqlıq artından keçti. Subetimiz vaqtında aqayım yaramay apis şaraiti aqqında ayttı. SİZOda berilgen aş ve suvları aşap-içmege yaramay. Ömür arqadaşım evden yollanılğan aşnı aşay. Kamerada buzdolap olmağanı içün aş tez bozula», – tarif etti o.
Qadın, tibbiy yardım da kerekli derecede kösterilmey dep qayd etti. Siyasiy mabüste tişleri ufana. O, tış ekimi ve protezcı hızmetine muhtac. SİZOnıñ tiş ekiminde ise ilk stomatologik yardımı bermek içün atta adiy ilâclar yoq.
Hatırlatamız, 2019 senesi fevralniñ 14-de Rusiye quvetçileri Qurman rayonındaki Büyük Onlar qasabasında qırımtatarlarnıñ evlerinde nevbetteki tintüvler keçirdiler. Üç qırımtatarnı yaqalap FSB idaresine alıp kettiler. Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlap olarğa qarşı cinaiy davalarnı açtılar.
Fevralniñ 15-de Aqmescitniñ Kiyev rayon «mahkemesi», tintüvden soñ qırımtatarlar – Eskender Abdulganiyev, Rustem Emirüseinov ve Arsen Abhairovnı Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlap apiske aldı.