1991 senesiniñ ilk yaz ayınıñ 26-nda Aqmescitte II Qırımtatar Milliy Qurultayınıñ birinci sessiyası başlandı ve ilk yaz ayınıñ 30-na qadar devam etti. Bu vaqia, sürgünlik ve basqılardan soñ qırımtatar halqınıñ milliy canlanuvı esnasında müim bir adım oldı.
II Qurultayda Ukrayina tamır halqınıñ temsiliy organı olğan Qırımtatar Milliy Meclisi meydanğa ketirildi. Bundan da ğayrı, delegatlar bir sıra müim qararlar aldılar:
– ️ Qırımtatar halqınıñ milliy muhtariyet beyannamesi
– ️ Qırımtatar halqı Qurultayınıñ qararı “Qırımtatar halqınıñ milliy bayrağı ve milliy gimni aqqında”
– ️ Qırımtatar Milliy Qurultayınıñ qararı “Latin urufatına keçüv aqqında”
– ️ Qırımtatar halqına, Qırım sakinlerine, SSCB (Sovet Sotsialistik Cumhuriyetleri Birligi) ve USSC (Ukrayin Sovet Sotsialistik Cumhuriyeti) organlarına, em de BMT, dünya parlamentleri ve ükümetlerine muracaat.
O devirde qırımtatarlar tarihiy Vatanına faal qaytıp, til, medeniyet ve milliy kimlikniñ ğayrıdan tiklenüvi esnasını başladı, Qırımtatar Resurs Merkeziniñ İdare Reisi ve Qırımtatar Milliy Meclisiniñ azası Eskender Bariyev qayd etti. O vaqıt halqnıñ esas milliy hususiyetleri resmiy şekilde qayd etildi:
“O künlerde suverenitet beyannamesi, bayraq ve gimn aqqında qarar, latin urufatına keçüv qabul etildi. Qurultay delegatları halqımıznıñ esas timsallerini tasdıqladılar”.
Şunıñ içün ilk yaz ayınıñ 26-ncısı – II Qurultay açılış künü – soñra Qırımtatar Bayrağı Künü oldı, bugünde-bugün o, tuvğan topraqta qaviylik, itibar ve azatlıq oğrunda küreşniñ timsalidir.
Fotoresim: Rifhat Yakupov