QRM öz faaliyetini artıq 8 yıldan berli alıp barmaqta.
Faaliyetimizniñ yönelişlerinden biri – işğal etilgen Qırımda insan haqları bozuvlarınıñ taqip etilmesi ve resmiy qayd etilmesidir. RF Ukrainağa qarşı cenk başlağanından berli ise faaliyetimizniñ dairesi kenişledi. RF cinayetlerini Herson ve Zaporojye vilãyetlerinde de qayd etmege mecbur qaldıq.
Bu işimiz pek emiyetlidir, çünki qabaatlılarnı mesuliyetlikke celp etmek içün RF cinayetleriniñ resmiy delilleri kerek.
Vesiqalarımız ve işğal etilgen Qırım haqqında malümatlarımız itibarlı halqara teşkilãtlarınıñ esabatlarında işletile: AQŞ devlet departamentiniñ insan haqları boyunca esabatlarında, Avropa Şurasınıñ insan haqları boyunca Baş Komissarı, BMT(OON), Human Rights Watch mahsus amellerinde ve il.
Şundan da ğayrı, bizge ukrain ve çetel media jurnalistleri Qırımdaki vaziyet haqqında aqiqiy haberlerni almaq içün muracaat eteler. Şu cümleden yaqında «United24.media» malümatlarımıznen faydalandı.
Faaliyetimiz nafile keçmegeni, faydalı olğanı ve dünyağa Qırımda rf cinayetleri haqqında tarif etmege yardım etkenine pek sevinemiz.