Çiçek ayınıñ 24-nci künü BMT Tamır halqlar meseleleri daimiy forumınıñ 25-inci sessiyası çerçivesinde Qırımtatar Resurs Merkezi, Ukrayinanıñ Birleşken Milletler Teşkilâtı yanındaki Daimiy Temsilciligi ve Qırımtatar Milliy Meclisinen beraberlikte “Devletlerara zıddiyetler şaraitinde tamır halqlarnıñ aqlarını temin etüv” mevzusında yañı tedbir keçirecek.
Muzakere esnasında iştirakçiler rusiyeniñ Ukrayinağa qarşı silâlı tecavuzı neticesinde, 2014 senesi Qırım işğali ile başlap, 2022 senesi tolu miqyaslı istilâğa keçirgen, tamır qırımtatar halqınıñ aqlarınıñ bozuluvı aqqında laf etecekler.
Makemede cemaat liderleri ve faallerniñ taqip etilüvi, Meclisniñ, qırımtatar halqınıñ temsil organı olaraq, yasaq etilüvi, qanunsız seferberlik, Qırımnıñ askeriyleştirilüvi ve grajdanlıq iştirakiniñ sıñırlanuvı baqılacaq.
Cenkniñ tamır qırımtatar halqınıñ beden ve ruhiy sağlığına tesiri ayrı blok olacaq. O infrastrukturanıñ yoq etilmesi, ekologik zarar, siyasiy taqipler, qanunsız tutuvlar, işkence, mecburiy köçürüv ve tıbbiy yardımnıñ sıñırlanmasınen bağlıdır.
Tedbir iştirakçileri devam etken devletlerara zıddiyet şaraitinde qırımtatar halqınıñ öz-özüni belgilev aqqınıñ yerine ketirilmesi meselesini, yasaq, işğal ve cenk şaraitinde tamır halqlarnıñ öz temsiliy organlarını idare etüv aqqını, devamlı ve adaletli barışıq içün barışıq qurma esnasında tamır halqlarnıñ rolüni, zıddiyet şaraitinde olarnıñ qoruv mehanizmlerini, em de cenkniñ tamır halqlarınıñ ekotizimleri ve sağlığına tesirini muzakere etecekler.
Spikerler:
Andriy Melnik – Ukrayinanıñ Birleşken Milletler Teşkilâtındaki Daimiy Temsilcisi
Refat Çubarov – Qırımtatar Milliy Meclisiniñ reisi
Hrıstına Ğayovışın – Birleşken Milletler Teşkilâtında Ukrayinanıñ daimiy temsilcisiniñ muavini
Eskender Bariyev – Qırımtatar Resurs Merkeziniñ idare reisi, Qırımtatar Milliy Meclisiniñ azası
Pavlo Sulândziğa – Rusiye tamır halqlarınıñ halqara komiteti (ICIPR)
Lüdmila Korotkıh – Qırımtatar Resurs Merkeziniñ adliyecisi
Tedbir saat 15-ten, 16:15-ke keçecek.
İsveç ve Norvegiya ükümetleri yardımınen “Askold ve Dir” Fondu çerçivesinde teşkil etilgen, ІСАР Birliginiñ idare etilüvnen teşkil etilgen.