2024 senesi avgust ayında işğal etilgen Qırımda fizik ve ruhiy sağlıqnıñ eñ yüksek seviyesine haq 12 kere bozuldu, olardan 11 – qırımtatarlarğa dair.
Ay devamında mezkür haq Qırım mahbüslerine dair bozulğan edi – Amet Suleymanov, Tofik Abdulgaziyev, Ruslan Nagayev, Enver Ametov, Remzi Kurtnezirov, İrina Daniloviç, Yaşar Muyedinov, Zaur Abdulayev, Asan Ahtemov, Server Mustafayev, Arsen Abhairov, Leniye Umerova.
Hapishanelerde mahbüslerniñ sağlıqları fenalaşa, kerekli tibbiy yardım kösterilmey, hastalarnıñ, atta olarnıñ advoktalarınıñ muracaatları cevapsız qala.
Şundan da ğayrı, kerek vaqıtta tibbiy yardım kösterilmegeni sebebinden Cemil Gafarov ve Konstantin Şiring vefat ettiler.
Qırımtatar Resurs Merkezi qayd etkenine köre, al-azırda işğalcılar hem üyken yaşta, em saqat ve hasta adamlarnı hapiste tutalar. Hapishane ve SİZOdaki müşkül şaraitlerden dolayı, hastalarnıñ şikãyetlerine qulaq asılmağanından, kerek vaqıtta tibbiy yardım kösterilmegeninden mahbüslerniñ sağlıqları hep fenalaşa.
RF-dan acele sürette siyasiy mahbüslerniñ azat etilmesini ve işğal etilgen Qırımda insan haqlarınıñ bozulmasını toqtatmağa talap etemiz.