QRM ekspertleri BMT (OON) zorbalıqlı yoq oluv boyunca Komitette baqılmasına azırlıq çerçivesinde esabat yolladılar.
‘Qırım işğali devrinde 24 adam zorbalıqnen ğayıp oldı. Olar aqqında hiç bir bilgi yoq. Olardan 18 – qırımtatar halqınıñ temsilcileri. 24 adamdan tek 9-zı işğalcı hakimiyet tarafından resmiy seviyede qıdırıldı. Daha 8 adam zorbalıqlı qaçırılğan edi. Amma faal cemaatçılarnıñ areketleri sayesinde olar tapıldı. Zorbalıqlı qaçırılğanlarnıñ 6 ölüsi tapıldı’, – denile esabatta.
Ekspertlerniñ aytqanına köre, rf her angi şahısnı zorbalıqlı ğayıp olunmasından qoruması aqqında Halqara konventsıyanı ratifikatsıya etmegenine baqmadan, Ukraina vatandaşları, şu cümleden işğal etilgen territoriyalarda qalğanlar da, şu konventsıyanen qorçalanalar. Çünki Ukraina mezkür vesiqanı 2015 senesi Yuqarı Şurası qararı ile ratifikatsıya etken edi.
Faqat rusiye Konventrsıyadaki maddelerge uymay. İşğal etilgen Qırımdaki huquqqoruyıcı sayılğan organlar böyle kibi davalarnı formal şekilde tetqiq eteler. Esabat muellifleri Reşat Ametov, Timur Şaymardanov, Ervin İbragimovğa dair oşağan vaziyetlerni misal olaraq ketirdiler.
Şundan da ğayrı, ekspertlerniñ qayd etkenine köre, rf 2022 senesinden soñ yañı işğal etilgen territoriyalarda da Ukraina tamır halqlarnıñ temsilcileri ve ukraintaraflı vatandaşlarnı qorquzmaq ve zorbalıqnen qaçırmaq adet aldılar. Ayrıca, QRM Herson ve zaporojye vilãyetlerinde 80 qaçırmanı qayd etti.
‘İşğal etilgen ukrain territoriyalarda zoraki qaçırılğan insanlarnı müşkül şaraitlerde tuta, işkencege ve maneviy basqı altında tutalar. QRM malümatlarına köre işğalcılar ‘profilaktik subetler’ keçirmekteler. Bu maqsat ile 2022 senesi işğal etilgen Herson ve Zaporojye vilãyetlerinde 8 işkence yeri yapılğan edi,’- qoşuldı esabatta.