İşğal devamında rusiyeliler 4 qırım advokatını litsenziyasız qaldırdılar. Olar arasında: Lilã Gemeci, Rustem Kamilev, Nazim Şeyhmambetov ve Aleksey Ladin.
QRM qayd etkenine köre işğalcılar içün qırım advokatlarına basqı köstermek adet olıp qaldı. Qoruyıcılarnı litsenziyadan mahrum qaldırmaqtan ğayrı, tintüv, idariy hapis, cöreme, tutuqlamalarğa oğratalar.
Misal olaraq, 2018 senesi Aqmescitte Kiyev rayon mahkemesi advokat Emil Kurbedinov 2013 senesi ‘Vkontakte’ ağında ‘ekstremist’ mizacı içün 10 künge idariy hapiske alındı. Şundan da ğayrı, işğalcılar advokatnıñ ofisinde tintüvler keçirip, tehnikasını aldılar.
2021 senesi advokat Edem Semedlãyev 12 künge hapiske alınıp, 4 cöremege polis hadimleriniñ talaplarına uymağanı içün mahküm etilgen edi.
2022 senesi mayıs ayında ekstremizmge qarşılıq kösterüv merkeziniñ hadimleri Aqmescitte advokat Edem Semedlãyevni tutuqlap, içtimaiy ağlarda derc etkeni içün qabaatlanıldı. Faqat Edem bey aytqanına köre, o özü bir şey bastırmadı, sadece adı digerlerniñ dercinde añıldı. Mahkeme neticesinde advokat 75 biñ ruble cöremege mahküm etilgen edi. Şundan da ğayrı, onıñ qoruyıcısı – advokat Nazim Şeyhmambetov da tutuqlanıp, 6 kün nezaret altına qapatıldı. Bundan soñra advokatlar Ayder Azamatov ve Emine Avamileva da tutuqlanğan ediler. Olar meslekdeşleri Nazim Şeyhmambetovnı qorumaq içün mahkemege kelgen ediler. İşğal etilgen Aqmescitteki Merkeziy rayon mahkemesiniñ hükmüne binaen Ayder Azamatov – 8 künge, Emine Avamileva – 5 künge nezaret altında qaldırıldı.
2023 senesi oktãbr 13-ünde advokat Aleksey Ladin tutuqlandı. Tintüv esnasında advokatlıq sırını bulundırğan malümatlar alındı. Ladin 14 kün ‘yasaq etilgen temsillerni numayış etkeni’ içün hapiske alındı, içtimiy ağlarda cenkke qarşı derci içün de cöreme tölemege mahküm olundı.
2024 senesi fevral 15-inde advokat Emil Kurbedinov işğal etilgen Qırımda fsb binası yanında tutuqlandı. O da 30 biñ ruble cöremeni tölemege mecbur etildi.
Şunı qayd etmelimiz ki, böyle kibi areketlerden vekãletliler zarar köreler, çünki advokatlar olarnı cinaiy davalar boyunca qorup olamaylar, mahkemelerde olarnı temsil etip olamay ve yıl devamında advokat statusını almaq içün imtian tapşıramaylar.
QRM rusiye silãhlı küçleriniñ qanunsız areketlerini israr ile tekbih ete. İşğalcı hakimyet qırımtatar halqına qarşı diskriminatsıon siyaset alıp barmaqta, çünki advokatlarnıñ episi qırımtatar halqınıñ temsilcileri olıp, ekseriyetnen qırımtatar siyasiy mahbüslerniñ menfaatlarını qorçalaylar.
QRM vaqtınca işğal etilgen Qırımda öz zenaatları boyunca faaliyet köstergen serbest advokatlarnıñ haqlarını yañıdan tiklemek, taqip oluvlarını toqtatmaqnı talap ete.