Cuma künü avgustnıñ 9-ında 2030 senesine qadar işğalcı rejiminden zarar körgen Ukraina tamır halqlarnıñ haqlarını temin etüv devlet siyasetiniñ Strategiyasını işlep çıqarılmasına bağışlanılğan körüşüv keçirildi.
Körüşüvde devlet organları, qırımtatar Milliy Meclisi, cemaat teşkilãtlarnıñ azaları, alimler, ayrıca da QRM reisi Eskender Bariyev de iştirak ettiler.
Strategiyanı azırlav Kontseptsıyasını İgor Mamontov azırladı – Qırım MC ve Aqyar şeher sakinleriniñ aqları boyunca Vekãletliniñ Temsilcisi yanında Ekspert keñeşiniñ azası, yuridik ilimler namzeti ve Ukrainada nam qazanğan yurist.
Eskender Bariyev öz çıqışında strategik vesiqalarnı azırlav kibi muhim iş içün teşekkürler bildirip, aynı zamanda tamır halqlar haqlarınıñ qoruv ve amelge keçirilüv boyunca yapılacaq işlerniñ Planını işlep çıqarmaq kerekligine diqqatnı celp etti.
‘ Ukraina tamır halqları haqqında qanun’da yönelişler belgilengen. Esaplarımızğa köre, Qanun çalışması içün 17 qanunastı maddeler kerek, olardan tek eki danesi mevcut: temsiliy organlarınen mesleat ve tamır halqlarnıñ temsiliy organınıñ huquqiy statusınıñ resmiyleştirilmesi aqqında’, – qayd etti ekspert.
QRM reisi qırımtatar Milliy Meclisiniñ bayağı uzanğan qanunlaştıruv meselesine de diqqat ayırdı.
‘ Ukraina Nazirler kabinetine Meclis boyunca vesiqalar taa 2023 senesi oktãbr 23-ünde tapşırılğan edi. Strategiya kibi vesiqalarğa dair ise tamır halqlarnıñ temsiliy organlarınen mesleatta bulunmaq kerek. Faqat Meclis qanunlaştırılmağance bunıñ imkãnı yoq’,- qoştı o.
Neticede Strategiyanen bir arada tamır halqlarnıñ qanunlarını qoruv ve amelge keçirilüv boyunca yapılacaq şeyler Planını işlep çıqarmağa teklif etildi. Böyle etip, Ukrainada tamır halqlarnıñ haqlarını inkişaf etmege yardım etken qanunlar olacaq.