QRM Halqara tamır halqlar künü munasebetinen bütün Ukraina boyunca informatsıon kampaniyanı başlata.
9 avgustta Halqara tamır halqlar künü qayd etile. Dünyada 5000 medeniyetniñ taşıcısı olğan tamır halqlarnıñ 476 million temsilcisi bar.
Ukrainada 3 tamır halq yaşamaqta: qırımtatarlar, qaraylar ve qırımçaqlar. Bu Şimaliy Qaradeñiz yanında asıl olunğan türk halqlardır. Asırlar devamında qırım türkleri türkiy dünyanı birleştirip, tıştan kelgen duşmanlardan qorçalay edi. Meşür muteffikir İsmail Gasprinskiyniñ ‘Tilde, fikirde, işte birlik’ sözleri bütün türk dünyasınıñ şiarı olıp qaldı.
Faqat yazıq ki, artıq 9 yıldan berli tamır halqlar devletara çatışma şaraitlerinde bulunmaqtalar. Şundan da ğayrı, tamır halqlarnıñ vatanı – Qırım Rusiye tarafından harbiy baza ve Ukrainağa ücüm etmek içün bir meydan olaraq qullanıla.
Bütün bu vaqıt devamında tamır halqlar öz vatanlarında esir kibi bulunıp, medeniyetlerini inkişaf etip olamaylar, basqı ve taqip altındalar.
Biz birleşip, tarihiy adalet oğrunda küreşte ğalebe qazanmalımız.
Qırımtatar halqına birdemlik kösterip, içtimaiy aktsıyamızğa qoşulıñız, plakatlarnı darqatıñız ve bizni eşitmeleri içün mıtlaq #LIBERATECRIMEA heştegini qullanmağa unutmañız.
