Bazarertesi künü, 24 iyünde, Qırım platforması Ekspert ağınıñ III Halqara forumınıñ birinci künü ‘Qırım platforması: devlet ve ekspert birleşmeniñ yañı kerçek şaraitlerdeki sinergiyası’ mevzuda qapalı tögerek masa ötkerildi.
Tedbirde Ukraina Yuqarı Şurası, Ukraina Mudafaa Nazirligi, Ukraina çetel işler Nazirligi, serbest ekspertler, halqara analitik merkezlerniñ, devlettet tış teşkilãtlar, Qırım Platformasınıñ iştirakçi devletlerniñ diplomatik korpusı ve akademik birleşmeniñ temsilcileri iştirak ettiler.
Tögerek masanıñ maqsadı devlet hakimiyet organları ve ekspert muhiti arasında işbirlikni qaviyleştirmek, RF başlatqan cenkte Ukraina ğalebe qazanması içün eñ effektiv ola bilecek ekspert issesini belgilemektir.
Ayrıca, tögerek masanıñ işine QRM reisi, qırımtatar Milliy Meclis azası, ‘Ukraina tamır halqları haqlarınıñ tiklenilmesi Qırım deokkupatsıyası içün bir alet olaraq’ adlı iş gruppasınıñ yolbaşçısı Eskender Bariyev de qoşuldı.
O, iş gruppasınıñ faaliyeti haqqında tarif etti.
‘İş gruppasınıñ iştirakçileri ve QRM I Global tamır barışıqqurucılar sammitini keçirmesiniñ teşebbüsçileri oldılar. Dünyanıñ çeşit regionlarından tamır halqlarnıñ temsilcilerinden ibaret global ağ asıl etilgen edi. Mezkür ağ BMT(OON) barışıqqurucılıq boyunca departament temsilcilerinen körüşip, BMT(OON) Baş Assambleyası tamır barışıqqurucılarnıñ 10-yıllığını ilãn etmesi içün muracaatnı teslim etti ‘,- dedi Bariyev.
Eskender Bariyev qayd etkenine köre, bugünge devletniñ esas meseleleri şulardır:
Ukraina territorial bütünliginiñ yañıdan tiklenilmesi;
Tehnikiy, maddiy, gumanitar destekniñ celp etilmesi;
Ukrainadan barışıq formulası;
Belli dünya mediasında analitik kontentniñ darqatılması.
‘Barışıq formulası aqqında laf yürsetkende Ukraina tamır halqlarnıñ temsilcileri bu formulanıñ şekillenmesinde iştirak etkenleri pek emiyetlidir. Asılında diger ülkelerniñ tamır halqları öz devletlerine tesir eteler ve böyle etip tamır halqlar arqalı şu devletlerni Ukraina barışıq formulasına celp ete bilemiz’,- dedi o.
Bariyevniñ aytqanına köre, QRM ve iş gruppası Ukraina dostlarını her şeyden haberdar etmek içün ğayret köstermekteler ve bu maqsatnen #LIBERATECRIMEA halqara areketniñ sahifeleri ukrain ve ingliz tilinden ğayrı, arap ve türk tillerinde de çıqarılmağa başlandı.
‘Qırım platforması Ekspert ağınıñ semereli işi içün biz öz özümizge tenqit közünen baqmalımız. Yazıq ki, ukrain hakimiyeti tarafından Qırım platforması Ekspert ağına teklifler kelmey, şunıñ içün de ağ ukrain devleti ve halqara cemaatçılıq içün faydalı ola bilecek kerekli analitik malümatlarnı azırlap olamay’, – añlattı o.
Ekspert qayd etkenine köre, Ukraina hakimiyetiniñ munasip organlarında mezkür meselelernen meşğul olacaq devlet hadimi ya da bölükler, demartamentler yoq.
‘ Ukrain devletini meraqlandıra bilecek keyfiyetli analitik malümatlar ile advokatsıon faaliyet yoq. Qırım Platformasınıñ ekspert ağı Qırımnıñ deokkupatsıyası ve reintegratsıyası boyunca devlet ve halqara siyasetniñ şekillenmesine tesir etmeli’,- qayd etti o.