Cumaaqşamı künü, 9 mayısta QRM temsilcileri V.Dal adına Şarqiyukrain Milliy universitetiniñ rektorı Olga Porkurãn ve ocalarınen körüştiler.
QRM reisi Eskender Bariyev, QRM yuristi Lüdmila Korotkih, QRM kommunikatsıya meneceri Tatyana Savçuk Qırım reintegratsıyası ve deokkupatsıyasına doğrultılğan cemaat teşkilãtınıñ faaliyeti haqqında tarif etti.
‘Alimlernen daha sıq bağda olmaq pek emiyetlidir. Beraber çalışsaq, Qırımnen, Qırım boyunca Ukraina qanuncılıqnıñ inkişafı, Ukraina tamır halqlarınen bağlı daha keyfiyetli analitik- araştırma işlerni yapıp olurmız,’- qayd etti Bariyev ve universitet temsilcilerine ‘Qırım istiqbali’ I Strategik forumnıñ ekspertleri tarafından işlep çıqarılğan Qırım reintegratsıyasına dair tevsiyelerni teslim etti.
Körüşüv devamında işbirlik memorandumı imzalandı. Böyle etip, studentler öz nazariy bilgilerni amelde işlete bilecekler, yañı bilgilerni daha qolay ala bilecekler ve Ukraina territorial bütünliginiñ tiklenilmesi oğrunda küreşke daha çoq meyil, meraq ve diqqat köstere bilecekler.
Kerçekten, studentlerimizni Qırım, insan haqlarını qoruv, ukrain territoriyalarnıñ deokkupatsıyası kibi mevzularğa davet etmek kerek. Studentler- memleketimizniñ kelecegidir ve öz haqlarımız ve Ukrainanıñ territorial bütünliginiñ tiklenilmesi oğrunda zorbalıqsız küreş içün bu meselelerni añlamaları muhimdir.
Hatırlatamız ki, QRM bir qaç yıl devamında işğal etilgen Qırımdan Kiyevge köçmege mecbur olğan Tavriya milliy universiteti, Milliy aviatsıya universiteti, İgor Sikorskiy adına Kiyev politehnik institutı, Kiyev-Mogilãn akademiya, M.Dragomanov adına Ukraina devlet universiteti ile işbirlik yapmaqtalar. Mezkür universitetlerniñ studentleri QRM tedbirlerinde faal iştirak eteler ve ğalebemizni yaqınlaştırmağa yardım eteler.