Bazar künü, 28 aprelde Kiyevde Yevgeniya Genovanıñ ‘Qırımtatar aileleri’ adlı kitap taqdim etildi.
Hatırlatamız ki, kitapta çeşit zamanlarda bir çoq sınavlardan keçken 14 qırımtatar qorantası haqqında tarif etile. Her sefer de farqlı adlarnen körülgen, amma asılında bir duşmandan azap çeke ediler: rusiye imperiyası olsunmı, Sovetler Birligi olsunmı ya da rusiye federatsıyası.
Taqdimde kitapnıñ qaramanlarından biri, Qırımtatar Resurs Merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı Eskender Bariyev de iştirak etti.
Kerçekten, kitapta yer alğan 14 ikãyeden Bariyevler ailesiniñ ikãyesi de bar. Mezkür ikãyede 2014 seneleri yüz bergen ve onlarnen yıl daha evel olıp keçkenler haqqında tarif etile.
Eskender Bariyev öz çıqışında 2014 senesi Qırım işğali nasıl başlağanını, olıp keçkenler ve qırımtatarlarnı öz Vatanında yaşamaq haqqı oğrunda küreşini añlattı.
‘Qırımda ilk tüntüvlerden biri evimizde keçirilgen edi. Rusiye silãhlı küçler saat 6 evime atılıp kirdiler. Evde oğlanlarım yuqlay edi, büyügi 4 yaşında, küçügi 6 aylıq edi. Adamlar her şeyni oba-tepe yaptılar, bilgisayar ve noutbooknı alıp kettiler’,- dedi o.
Bariyevler ailesi Qırımdan ketip, Qırım tışında öz muqavemetini devam etmege mecbur oldılar ve ‘Qırımtatar resurs merkezi’ adlı teşkilãtnı qurdılar. Artıq 10 yıl devamında Qırım işğalinen kreativ şekilde küreşmekteler ve halqara cemaatçılıqnı RF cinayetleri, ukrain cemiyetini ise tamır qırımtatar halqı haqqında haberdar eteler.
Bariyevniñ fikrine köre, böyle kitaplar qırımtatar halqınen aile hikãyeleri sayesinde ögrenmege imkãn bere.