2014 senesi rusiye Qırımnı işğal etken soñra biñlernen faalliler öz vatandaşlıq mevamları içün basqı altında qaldılar. Cinaiy davalar açıldı, toqtamadan tutuqlama, tintüv, yaqalamalar yüz bermekte, zorbalıqnen adamlar qaçırıla. Yarımada qanunsızlıq territoriyasına çevirildi.
Rusiye, halqara huquqnı bozaraq, Qırım yarımadasında qırımtatarlar ve ukraintaraflı faal cemaatçılarğa qarşı basqı köstermege devam etmekte.
Şundan da ğayrı, böyle areketler Ukrainanıñ yañı işğal etilgen territoriyalarında da, yani Zaporojye ve Herson vilãyetlerinde yüz bermekte. İşğal etilgen Qırımda ise rf Ukranağa qarşı cenk başlatqan soñ vaziyet tek fenalaşa.
Al-azırda QRM malümatlarına köre, 194 siyasiy mahbüs qayd etildi, olardan 134- qırımtatar, 2022 senesine qadar 124 adam, olardan 93 qırımtatar qayd etilgen edi.
Şundan da ğayrı:
Qırım işğalinden başlap, 2022 senesine qadar 342 tintüv (256 qırımtatarlarğa nisbeten), cenk başlağan soñ ise -115 (olardan 71 qırımtatarlarğa nisbeten) yüz berdi.
Qırım işğalinden soñ ve 2022 senesine qadar 1215 tutuqlama (1006 qırımtatarlarğa nisbeten) ve 1036 hapiske alınuv (781 qırımtatarlarğa nisbeten), cenk başlağan soñ ise – 294(214 qırımtatarlarğa nisbeten), 410 hapiske alınuv (282- qırımtatarlarğa nisbeten) qayd etildi.
Qırım işğalinden soñ ve 2022 senesine qadar 97 hüküm, cenk başlağan soñ ise 110 hüküm kerçekleştirildi.
Şundan da ğayrı, Herson ve Zaporojye vilãyetlerinde eñ azdan 344 adam (olardan 97 qırımtatar) tutuqlandı, 45 hapiske alınuv (olardan 26 qırımtatarlarğa nisbeten) qayd etildi. 31 adam, olardan 19- qırımtatar, Qırım SİZOlarında bulundı.
Körgenimiz kibi, rf qanuncılığını haqsız şekilde siyasiy menfaatlarına, ayrıca da qırımtatarnıñ zorbalıqsız küreşini, işğalge qarşı itirazını bastırmaq içün qullanmaqta.
QRM halqara cemaatçılıqnı rf-na Qırımda siyasiy taqiplerni toqtatmaq maqsadınen basqını arttırmaq, işğal etilgen Qırımda insan haqları bozuvları içün mesuliyetli şahılarğa qarşı sanktsıyalarnı kirsetmege çağıra.