Çarşenbe künü, 26 iyülde saat 12.30 QRM ‘Ukrinform’ informatsıon agentliginde ‘İşğal etilgen Qırımda NATOnen bağlı sahte haberler’ mevzusında taqdimini keçirdi. Tedbir devamında spikerler 2023 senesi QRM işğal etilgen Qırımda NATOnen bağlı sahte haberler darqalğanı haqqında añlattılar.
Spikerler:
Eskender Bariyev – Qırımtatar resurs merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı;
Sergey Parhomenko- QRM meneceri;
Beata Patasova- Rusiye ve Şarqiy Avropa ortaq-ülkelerde leyhalar rehberi, NATO ştabı cemaat diplomatiyası İdaresi;
Moderator: Tatyana Podvornãk – QRM kommunikatsıya meneceri.
‘Sahte haberlerniñ darqalması pek havflıdır. Yañlış bilgiler yardımınen insanlarnıñ fikirlerni deñiştirmek, atta cenk başlatmaq mümkün. Böyle etip, sahte haberler, yañlış bilgi, teşviqat – RF-nıñ esas aletleri sayılır ki, yazıq ki, olarnı onlarnen yıl devamında işğal etilgen territoriyalarda, şu cümleden Qırımda da qullanalar’, – añlattı Tatyana Podvornãk.
RM kommunikatsiya meneceri şunı da qayd etti ki, işğal etilgen Qırımdaki KHV sahte haberler hiç yañı vaqia degil. Mezkür mevzu alã pek aktual olğanı içün NATO haqqında yañlış bilgilerniñ darqalmasını toqtatmaq pek emiyetlidir.
Eskender Bariyev şunı qayd etti ki, NATO haqqında sahte haberlerniñ darqalma hususiyetlerini tahminen nevbetteki devirlerge ayırmaq mümkün: ‘NATO sammitinden evel’, ‘Sammit arfesinde ve ketişatında’, ‘Sammitten soñra’.
‘Sammitten evel teşviqatçılar öz sahte haberlerinen ‘Alyans’ aman-aman rus-ukrain cenkiniñ iştirakçisi olğanında qandırmağa tırışa ediler. Sammit arfesinde Ukrainanı NATOda kimse beklemegenini aytmağa başladılar. Hem de Alyans zayıf, avropa devletleri AQŞ olarnı cenkke itegenini tanımağa istemeyler,’- dep añlattı o.
Ekspertniñ aytqanına köre, sammitten soñra kene de Ukraina NATOğa kirecek kibi telükeler, Ukrainanıñ Alyansqa kirmesi- Rusiye içün havflı olğanı urğulanmağa başlanıldı.
Sergey Parhomenko qoşqanına köre, sahte bilgilerni darqatqan KHV arasında böyle neşirlerni qayd etmege mümkün: ‘Qırım haberleri’, ‘ Aqyar.Qırım. Haberler.’, ‘Aqyar haberleri’ ve il.
‘Bir de bir yañlış bilgi bermek içün rusiyeliler aynı bir haberde sade mantıqnı boza bileler. Misal olaraq, ‘Komsomol aqiqatı’ resursı NATO sammitniñ arfesinde ekspetlerniñ Ukrainanı NATOğa endi şimdiden qabul eteceklerine dair ğayelerinden birini neşir etken edi. Faqat mevzusı NATO havfsızlıq kefaletlerini işğal etilmegen territoriyalarda darqatacaqnen bağlı edi. Kreml teşviqatçıları NATO Ukrainanı bölmek ve qısım-qısım qabul etecegine dair sahte haberlern darqata. Aytqanlarında mantıq degen şey aslı mechül olğanını köremiz’, – qayd etti Parhomenko.
Beata Patasova NATOnıñ dezinformatsıyağa qarşılıq kösterüvde yanaşması haqqında tarif etip, şunı qayd etti ki, sahte haberlerge tez vaqıtta cevap bermek ğayet emiyetli, faqat qarardan ziyade diqqat köstermege acet yoq. Yañlış bilgilerge qarşılıqnı ne vaqıt aşikãr etmek, ne vaqıt ta diqqatsız qaldırmaqnıñ daha uyğun olmasını tüşünmeli.
‘NATO rusiye feyklerge kerçek bilgiler, samimiyet ve KHV faal qonuşuvnen qarşılıq köstere. Yañlış bilgilernen küreşimizde informatsıon mühitni talil etmek, añlamaq, eñ ciddiy haberlerni doğru köstermekni tercih etemiz. Sahte haberlerge tez vaqıtta munasip cevap bermeli’, – qoştı o.