Salı künü, 4 iyülde, ‘Musafir’ restoranında sabalıq yemegi devamında QRM taqımı ukrain media temsilcilerine #LIBERATECRIMEA informatsıon kampaniyası haqqında tarif ettiler.
Tedbirge 5 kanal, Suspilne, Krım, Çernomorskaya TRK, QirimNews, Dialog.ua kibi ve diger KHV temsilcileri iştirak ettiler.
‘Bugün biz ukrain ve çetel vatandaşlarnı Qırım vaziyetinden, ayrıca da Ukraina tamır halqları olğan qırımtatarlar, olarnıñ medeniyeti, adetlerinden haberdar etken #LIBERATECRIMEA kampaniyasını muzakere etmek içün toplaştıq. Biz faaliyetimizni devam etmektemiz, amma daha yahşı olmaq, ösmek ve inkişaf etmek niyetindemiz. Şu sebepten de ukrain jurnalistlerinen işbirlik ve tecribenen paylaşuvğa daima azırmız’,- qayd etti Eskender Bariyev.
QRM kommunikatsıya meneceri Tatyana Podvornãk körüşüv iştirakçilerine #LIBERATECRIMEA kampaniyasını taqdim etip, vizual mahsulatlarnı numayış etti ve ilerideki planlarımıznı açıqladı.
Jurnalistler tercibenen paylaşmaq imkãnı içün teşekkürler bildirdiler. Ayrıca da, KHV temsilcileri QRM taqımına bir sıra yañı ğaye, yanaşmalarnı teklif eterek, ileride beraber yapılacaq leyhalar, şu cümleden Qırım toponimikasınıñ tiklenilmesi, yarımadada haqsız seferberlik, Qırımnıñ kelecegi ve bunıñ kibi mevzularğa dair faaliyet aqqında añlaştılar.
Qırımnıñ işğalden qurtarılması oğrunda çalışmağa devam etemiz!
Yañı faaliyetimizni bekleñiz!
#LIBERATECRIMEA kampaniyası QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Leyhanıñ mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.