Nazir muavini İrina Vereşçuk reisligi ile qırımtatar tili boyunca Milliy komissiyanıñ toplaşuvı keçirildi. Tedbirge devlet organları, tilşınaslar qoşuldılar.
Reintegratsıya nazirliginiñ matbuat hızmeti qayd etkeni kibi, al-azırda Komissiya işiniñ esas yönelişlerinden biri – balalarnı qırımtatar tiline ögretmek ve tasil esnası içün mutehassıslarnı azırlamaq.
Ayrıca, şimdi 5-6 sınıflar içün qırımtatar tili ve edebiyatı dersligi azırlanılmaqta, nevbette 10 sınıf dersligi de çıqarılacaq. Şundan da ğayrı, olacaq mutehassıslar Taras Şevçenko adına Kiyev milliy universitetiniñ filologiya şübesinde qırımtatar tilini ögrenmege başladılar.
Hatırlatamız ki, 2015 senesinden berli Qırımtatar Resurs Merkezi qırımtatar tiliniñ saqlanılması ve inkişafı oğrunda faaliyet köstermekte:
– QRM saytı 4 tilde çalışa
– 2019 senesi Qırımtatar Resurs Merkezi qırımtatar tiline insan haqları Deklaratsıyasını tercime etti ve onı OON resmiy saytında yerleştirdi. 2021 senesi insan haqları Avropa Konventsıyası qırımtatar tiline tercime etildi. Şundan da ğayrı, Qırım ve qırımtatarlarnen bağlı ukrain qanunlarını da tercimesini planlaştıramız.
– QRM Qırımnıñ toponimik adlarınıñ qaytarılmasına doğrultılğan ‘Adlarnı qaytarmaq – Qırımnı qaytarmaqtır’ adlı informatsıon kampanyasını keçirmekte ki, o da qırımtatar tiliniñ saqlanılmasına yardım etecek.