24-25 mayıs künleri Kiyevde ukrain cemaatçılığını birleştirmek içün devlet, etnik ve diniy birleşmelerniñ işbirligi meseleleri boyunca muşavere keçirildi.
Tedbirde vilãyet ve Kiyev şeheri etnosiyaset ve vicdan serbestligi boyunca harbiy memuriyetiniñ 46 hadimi, devlet hakimiyet organlarınıñ temsilcileri, alimler iştirak ettiler. Seminar devamında iştirakçiler etnosiyaset, Ukrainanıñ cenkten soñra yañıdan tiklenilmesinde etnosiyasiy ve diniy faktornıñ rolü ve diger mevzularğa ait 10 maruza diñlenildi ve muzakere etildi.
Muşavereniñ ilk kününde Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev GESS yanında cemaat keñeşiniñ Reisi olaraq çıqışta bulundı. Ayrıca, Bariyev VPL (yerini deñiştirmege mecbur olğan şahıslar) haqqında tarif etti.
‘Al-azırda VPL daha çoq peyda ola, olarğa öz etnik ve din menligini saqlamağa yardım etmeli. QRM DESSnen birlikte ‘ТурБОТа о ВПЛ’ (‘VPLge itina’) adlı çat-botnı meydanğa ketirdi. Çat VPL içün, şu cümleden Ukraina milliy azlıqlar ve tamır halqlar temsilcileri içün eñ kerekli malümatlarnı topladı,’ – qayd etti o.
Şimdilik çat-bot 4 büyük şeherni qaplap ala: Kiyev, Lvov, Çernovtsı, İvano-Frantsisk. Faqat kelecekte dairelerniñ keñleşmesi ve daha çoq malümat kirsetilmesi planlaştırıla.
Şundan da ğayrı, seminar çerçivesinde Bariyev şunı qayd etti ki, ayrı statusqa ihtiyacı olğan eki milliy azlıq – rom ve gagauzlarğa diqqat ayırmalı.
Hem de ekspert ‘Tamır halqlar haqqında’ qanunnı amelge keçirüvniñ emiyetligini de urğuladı.