Cumaaqşamı künü, 19 martta Qırımtatar resurs merkezi yerli öz-özüni idare etüv organları içün havfsızlıq boyunca onlayn-trening keçirdi. Tedbirge bütün Ukrainadan 40 iştirakçi qoşuldı.
.jpg)
Onlayn-treningi programma koordinatoru Ayder Seytosmanov, idare reisi Valentina Poltavets ve QRM reisi Eskender Bariyev alğış sözlerinen tedbirni başladılar.
Bir qaç saat devamında iştirakçiler nevbetteki mevzular boyunca lektsıyalar diñlediler.
-tintüv, sorğu, yaqalama yüz bergende ne yapmalı?
-havfsızlıq planı qoruma vastası olaraq. Şahsiy havfsızlıq planı nasıl tizilir?
QRM meneceri Lüdmila Korotkih işğalcı hakimiyetniñ böyle kibi areketleriniñ qanunsız olğanını yuridik cehetten añlattı.
‘Cenk zamanında ealiniñ qorulması haqqında Jeneva konventsıyasınıñ 54 maddesine binaen işğalcı devlet işğal etilgen territoriyalarda sanktsıyalar kirsetmek, bir şeyge zorlap yaptırmaq, diskriminatsıyağa oğratmaq yasaqtır’,- qayd etti Korotkih.
Faqat şimdiki zamanlarda, RF tarafından qanunsız çağırmalar, yaqalama, sorğu, tintüvler yüz bergende, böyle kibi vaziyette özüni nasıl alıp barmaqnı tam şekilde bilmeli.
QRM reisi Eskender Bariyev bulunğanarnı havfsızlıq planınıñ hususiyetlerinen tanıştırdı.
Onıñ aytqanına köre, havfsızlıq planınıñ temelinde tehlüke, qorquzma, hassaslıq, resurslar turmaqta. Bu kategoriyalarnı doğru tizilmesi insan havsızlığını teminler, şahsiy planlar esasında ise kollektiv planı qurula.
‘İşğal devrinde, huquqiy qorçalav aciz qalğan vaqıtta telüke resurslar seviyesinden daha üstün olğanını añlaymız. Faqat yerli şuranıñ her deputatı, başı, huquqqoruyıcı ya da faalli, işğal etilgen territoriyada bulunaraq, vaizyetke doğru qıymet kesmeli’,- qayd etti Bariyev.
İştirakçilerniñ spikerlerge raatsızlağan sualler bermek imkãnı bar edi: hayinlik haqqında, işğal etilgen territoriyalardan çıqmağan alda neticeleri ne olur, yerli şuralar tarafından işğal şaraitlerde qararlar alınması, ailege telüke olğan zamanda özüni nasıl alıp barılması haqqında ve il.