78 yıl evel, 1944 senesi mayısnıñ 18-inde Sovetler Birligi yolbaşçılarınıñ qararı ile qırımtatarlar öz tarihiy Vatanı – Qırımdan zorbalıqnen köçürildiler. Resmiy malümatlarğa köre 200 000 biñge yaqın qırımtatar çıqarıldı.
1944- 1956 seneleri devam etken komendant rejiminiñ vahşiy şaraitleri- açlıq, hastalıqlar, repressiyalar- qırımtatar halqınıñ, esasen qartlar, qadın ve balalarnıñ elãk olmasınıñ sebebidir. 1960 seneleriniñ ortalarında Qırımda qırımtatarlarnı cedvelge alğan Qırımtatar milliy areketiniñ bilgilerine köre, umumen Qırımdan 238 500 adam çıqarıldı, 110 200 adam elãk olundı, bu da 46,2 % teşkil ete.
Yazıq ki, bütün dünya öz vaqtında bu cinayetni takbih etmedi. Cezasız qalğan cinayet ise tekrarlandı. Artıq RF ukrain halqına qarşı genotsıd kerçekleştirmekte.
Her kün yañı ölüm, tutuqlama, qaçırmalar, insanlarnı Ukrainadan RF territoriyasına zorbalıqnen köçürilmesi- zemanemizniñ kerçekleridir.
Şimdilik RF territoriyasına 1 mln 185 biñ ukrain vatandaşı çıqarılğanı belli. BMT(OON) esaplamasına köre ise 5,5 millionğa yaqın ukrain çetelge ketti.
Rusiye hakimiyeti yıllar devamında Ukraina ve onıñ halqını yoq etmege ıntıla edi:
-Golodomor (açlıq) 1921-1923, 1932-1933, 1946-1947
-1944 senesi qırımtatarlarnıñ sürgünligi
– 2014 senesi Qırım ve Donbassnıñ işğali
– 2022 senesi Ukrainağa qarşı cenk.
Şimdilik qırımtatar sürgünligi resmiy şekilde genotsıd olaraq 2015 senesi noyabrniñ 12-sinde Ukraina Yuqarı Şurası ve 2019 senesi Latviya ve Litva parlamentleri tarafından tanıldı. Mezkür cinayetni bütün dünya tekbih etmesi pek emiyetlidir, çünki böyle kibi facialar tekrarlanmamalı.
Biz bunu toqtatmalımız!