QRM ‘Qırım militarizatsıyanıñ qırımtatar halqınıñ haqlarına tesiri’ mevzuda esabatnı tamır halqlarnıñ haqları boyunca Ekspert mehanizmge yolladı.
Esabat aynı mevzudaki maruza içün işletilecek. Ekspert mehanizmi onı 2023 senesi iyül ayında keçirilecek heryıllıq sessiyasında taqdim etecek. Şundan da ğayrı, vesiqa soñunace işlenilip, 2023 senesi sentãbr ayında insan haqları boyunca Keneşniñ 54-ünci sessiyasında da taqdim etilecek.
QRM işğal etilgen Qırımnıñ militarizatsıyası, ordu hızmetine qanunsız davetler, Ukrainağa qarşı savaşmaq maqsadınen rusiye ordusına seferberlik haqqında bilgi berip, işğalcılar rusiye qanunlarını işletip, ukrain vatandaşlarını taqip etmek içün mahsus yañı aletler uydurğanlarını añlattı.
Vesiqada qayd etile ki, tamır qırımtatar halqınıñ temsilcileri öz Vatanlarında barışıq ve havfsılıq şaraitinde yaşap olamaylar. Seferberlikten qaçınmaq içün 18-60 yaşında olğan biñlernen qırımtatar evlerini, vatanını terk etmege ve üçünci memleketlerge köçmege mecbur qalalar.
Böyle kibi siyaset qırımtatarlarğa nisbeten sürgünlik şekillerinden biri sayılıp, tamır halqlarnıñ haqları haqqında BMT(OON) 10 Deklaratsıyasını boza.
‘Qırımtatar tamır halqınıñ öz haqlarını qorçalamaq içün halqara cemaatçılıqnıñ destegine ihtiyacı bar ve barışıq, körgen zararlarınıa qarşılıqnı almaqnıñ mahsuldar usulını işlep çıqarmaq içün EMRIP azalarını celp etmeleri kerek’,- denile esabatta.
