Ukraine has officially completed the ratification of the Convention on the Prevention and Combating of Violence against Women and Domestic Violence, known as the Istanbul Convention.
Mezkür konventsıyanıñ ratifikatsıyası zarar körgen qadınlarnıñ huquqiy qoruvını arttırır, adaletni elde etmege imkãn berir. Şundan da ğayrı, vesiqa tek Ukrainada degil de, çetelde zarar körgen Ukraina vatandaşları olğan qadınlarnı qorumağa imkãn açar.
QRM İstanbul konventsıyasınıñ ratifikatsıyasına qol tuta.
Kerçekten de, biñlernen qadın öz haqlarınıñ bozuvından, diskriminatsıya , ayrıca da şiddetten azap çekmekte. Yazıq ki, bu meselede Qırım da istisna sayılmaz.
2014 senesi Rusiye Qırımnı işğal etken soñra yüzlernen faal cemaat erbapları öz vatandaşlıq mevamları içün repressiyalarğa oğratıldı. Eñ başından tek erkekler zarar körgen olsa, ileride rusiye hakimiyeti qadınlarnıñ haqlarını da sıñırlamağa başladı.
Qırım işğali devamında yarımadada 12 qadın elãk oldı, olardan 3 qırımtatar. 82 yaşında olğan Veciye Kaşkanıñ, onı tutuqlamaq istenilgende can bergeni- sahte huquqqoruyıcılarnıñ qırımtatar qadınlarına qaşrı basqınıñ deşetli misalidir.
Qırım siyasiy mahbüslerniñ aileleri bu sırada eñ çoq azap çekmekteler. Ekseriyetnen, çoqbalalı, maddiy sıqıntıları olğan, imanlı ailelerdir. Böyle aileni temin etken erkek alınsa, qorantanı qadın baqmağa mecbur qala. Neticede, bala terbiyasına tolusınen diqqat ayırıp olamay, cemiyette öz bigilerini qullanmaq imkãnlarından mahrum qalalar.
Advokat Emine Avamileva ağımdaki sene 5 mayısta öz vazifesini becergen vaqıtta 5 künge idariy hapiske alındı.
Qırımtatar qadınları adet üzre siyasiy hayatta faal iştirak etip kelgenler. Böyle etip, Milliy Meclis yasaq etilgeninden ve Qırımda işğalcı hakimiyetniñ areketlerinden dolayı öz temsilcilik vazifelerini amelge keçirmesinde bayağı sıñırlandılar. Aksiy alda, Qırım yarımadasında böyle faaliyet sebebinden ekstremist teşkilãtnıñ faaliyetinde iştiragında qabaatlanmaq ve memuriy mesuliyetke çağırılmaq mümkün.
Rusiye Ukrainağa qarşı cenk başlatqan soñ yañı işğal etilgen Herson ve Zaporojye vilãyetlerinde qırımtatar qadınları taqip qurbanları oldılar. 24 qırımtatar qadın zorbalıqnen qaçırıldı.
QRM Rusiyeden qırımtatar qadın-qızlarğa qarşı diskriminatsıya ve basqını ve işğal etilgen territoriyalarda bütün tamır halqlar temsilcileriniñ taqibini toqtatmağa talap ete.
Hatırlatamız ki, QRM bu yönelişte muntazam şekilde çalışmaqta. İşğal etilgen Qırımda ve Ukrainada cenk başlağanından berli yañı işğal etilgen territoriyalarda qadın haqlarınıñ bozuvlarını resmiy qayd etmeknen oğraşamız.
Faaliyeti devamında QRM ekspertleri tarafından halqara huquqqoruyıcı teşkilãtlarğa onlarnen ariza, şikãyet ve esabat yollanıldı. Şundan da ğayrı, farqlı seviyede mevzuğa ait bir sıra tedbirler keçirildi.