On Thursday, November 5, representatives of the Crimean Tatar Resource Center met with the Ambassador of Lithuania to Ukraine Valdemaras Sarapinas. The interlocutors discussed the situation in the occupied Crimea, the CTRC presented the main directions of the organization’s activities, and the parties agreed to jointly hold a number of events.
Körüşüvde Litva Cumhuriyetiniñ Ukrainada Elçisi Valdemars Sarapinas, Qırımtatar Maaliy Merkezi idaresiniñ yolbaşçısı, Qırımtatar Milliy Meclisiniñ azası Eskender Bariyev ve QMM yöneticisi Zarema Bariyeva iştirak ettiler.
Qırımtatar Maaliy Merkeziniñ temsilcileri diplomatnı vaqtınca işğal etilgen Qırımda insan aqlarınıñ bozuluvı saasında vaziyetnen tanıştırdılar, siyasiy mabuslar, yarımada işğal etilgen soñ ğayıp olğan ve elâk olğan insanlar aqqında ikâye ettiler. Qırımtatar Maaliy Merkezi tarafından işlep çıqarılıp, 4 tilde mevcut olğan ve daimiy rejimde Qırım işğal etilgeninden berli elâk ya da ğayıp olğan, siyasiy sebeplerden apiste tutılğan insanlarnıñ aktual sayısını köstergen "Qırım işğaliniñ qurbanları" açıla bilgen diagrammalar taqdim etildi.
Diplomatqa qırımtatar tili yarımadada qıyın vaziyetke tüşkeni aqqında haber etildi. QMM temsilcileri işğlaciler milliy mekteplerniñ statusını umumiy orta mekteplerge deñiştirgenini ve qırımtatar sınıflarnıñ açılmasına keder etkenlerini qayd ettiler.
Valdemars beyge yarımadanıñ işğal etilmesi neticesinde reinelerge çevirilip, yarımadada yaşamağa devam etken ve memleket içinde avuşqan onar qırımtatar horantanıñ taqdirini tasvir etken ''İşğalniñ reineleri'' adlı albom taqdim etildi. Bundan ğayrı, Qırımtatar Maaliy Merkezi tarafından Qırım siyasiy mabusları, Qırım işğal etilgeninden berli elâk ya da ğayıp olğan insanlar aqqında azırlanğan ''Babam qaramandır!'' serlevalı buklet ediye etildi.
Bundan ğayrı, taraflar tacmaraz salğınını esapqa alıp, onlayn şekilinde bir sıra tedbirlerni keçirmege añlaştılar.
''Bir qaç tedbirni birleştirmege mümkün. QMM öz taraftan Seym deputatlarını vaqtınca işğal etilgen Qırımdaki vaziyet aqqında haberdar etmege, siyasiy mabuslar aqqında daa tolu malümat bermege, ''İşğalniñ reineleri'' ve ''Qırımtatarlar'' mevzusında sergiler teşkil etmege azırdır'', – dep qayd etti Eskender Bariyev.
Diplomat işbu teklifke qol tuttı ve Litva Seymi öz qararınen 2021 senesini Litva tatarları senesi olaraq ilân etkenini haber etti. Valdemars bey işbu tedbir çerçivesinde em Litvada, em Ukrainada bir sıra umumiy teşebbüsler keçirmege mümkün olğanını qayd etti.
Bundan ğayrı, siyasiy mabuslarnı ve olarnıñ qorantalarını siyasiy imayege alınmasını közde tutqan ''Atalıq'' teşebbüsi aqqında tarif etildi.
QMM hadimleri Litva Cumhuriyetinine qırımtatar halqınıñ sürgün etilmesini soyqırım olaraq tanığanı içün teşekkürlerini bildirip, Litvanıñ bir çoq devletke Putin rejimine nasıl etip qarşılıq kösterilecegine dair bir nümüne olğanını qayd ettiler. Bundan ğayrı, Litva Cumhuriyeti ''Magnitskiy aktına'' benzer senetlerni qabul etken altı devletten biridir, bu ise işğal etilgen Qırımda insan aqlarınıñ bozulması içün mesüliyetli olğan memurlarğa qarşı şahsiy sanktsiyalarnı qabul etmege yardım etken müim vastadır.
Diplomat öz nevbette Ukrainanıñ egemenligine ve topraq bütünligine daimiy şekilde qol tutqanını, Litva Cumhuriyeti iç bir vaqıt qanunsız Qırım ilhaqını tanımaycağını qayd etti.