2016 senesi 26 aprel künü Qırım Aliy ‘mahkemesi’ qırımtatar temsil organı – Milliy Meclisniñ faaliyetini yasaqladı. Teşkilãtnı ekstremist olaraq tanıp, Rusiye Federatsıyası ve işğal etilgen Qırımnıñ territoriyasında yasaq ettiler. 7 yıldan berli QRM taqımı halqara teşkilãtlar ve muessiselernen bilrikte işğalcılarnıñ qanunsız qararınen küreşmekte.
Şunı qayd etmek kerek ki, rusiye federatsıya teşkilãtnı yasaq etmeknen sıñırlanmayıp, azalarına qarşı repressiyalarda bulunmaqta. Qırımtatar Milliy Meclisniñ bir çoq azalarına qarşı cinaiy işler açıldı. Hatırlatamız ki, Milliy Meclis reisiniñ muavini Nariman Celãl halã daha hapishanede bulunmaqta. Onı 17 yıl azatlıqtan mahrum etmek ve 700 biñ ruble cöneme cezalarına mahküm ettiler. Sudaq regional Meclis reisi İlver Ametovnı da işğalcılar basqı altına alıp, 8 aylıqqa serbestligini sıñırlağan ediler, cöremege mahküm etip, qanunsız tintüvler keçirgen ediler.
Öz tarafından QRM BMT (OON) tamır halqlarnıñ haqları boyunca mahsus maruzacı, BMT Ekspert mehanizmine esabat ve maruzalarnı muntazam şekilde yollay. Şundan da ğayrı, teşkilãt azaları halqara meydanlarda çıqışları devamında Milliy Meclisniñ qanunsız qapatılması haqqında daima bahs eteler.
Hatırlatamız ki, 2017 senesi 16 yanvarde Ukraina BMT(OON) Halqara mahkemesinde Rusiye Federatsıyasına qarşı dava açtı Kİyev Moskvanı terrorizmni maddiy temin etüvnen küreş haqqında Halqara konventsiya, irq diskriminatsıyasınıñ bütün çeşitlerini yoq etüvi boyunca Halqara konventsıyasını bir sıra ve sistematik şekilde bozğanlarında qabaatlay.
2017 senesi aprel ayında BMT (OON) Halqara mahkemesi işğal etilgen Qırımda RF-nıñ areketlerine qarşı vaqtınca çareler tapılması haqqında qarar aldı. Böyle etip, Gaaga BMT (OON) mahkemesi RF-ni qırımtatar Mİlliy Meclisiniñ işini devam ettirmege mecbur etse ede, RF bu qararğa bu künge qadar uymay.