Uydurma: ukrainler- Ukraina tamır halqı.
Haqiqat: qırımtatarlar, qaraylar, qırımçaqlar – Ukraina tamır halqları, ukrainler ise titullı, baş millet.
2021 senesi 23 iyülde ‘Ukraina tamır halqları haqqında’ Ukraina qanunı amelge keçirilmege başladı. Faqat bu qanun ne haqqında, Ukraina tamır halqları kimlerdir?
Bir çoqları Ukraina tamır halqı ukrainlerniñ özleridir dep saya ve bu yerde qırımtatar, qaray, qırımçaqlarnıñ ne alãqası olğanını añlamaylar. Asılında ise bu fikir doğru degil ve biz onı añlatmağa tırışacaqmız.
Keliñiz, añlamağa tırışayıq, bir etnik gruppa tamır halq olaraq tanılması içün nasıl alãmetlerge malik olmalı. Esas üç alãmet eñ mühim sayılır:
- Etnik gruppanıñ öz devleti yoq;
- Etnik gruppa özüni tamır halq olaraq belgiley ve öz menligini saqlamağa tırışa;
- Etnik gruppanıñ yaşağan territoriyasınen tarih ve medeniy bağları bar.
Böyle etip, ukrain halqı öz devletine sahip olğanı içün tamır halq olamaz.
Ukrainler – titullı, baş millettir ki, devletni meydanğa ketirgen mllettir.
Şimdi ise yuqarıda añılğan ‘Ukraina tamır halqları haqqında’ Ukraina qanunına qaytayıq. Qanunda qırımtatarlar, qaray ve qırımçaqlar tamır halqlar olğanları açıq-aydın belgilene.
Aynı bu halqlar qırım yarımadası territoriyasında şekillenip, Qırımdan ğayrı hiç bir Vatanğa sahip degiller.
Artıq tamır halq ve titullı millet arasında farqını añlağandırsız, degen ümüttemiz.