Ukraina Yuqarı Şurası Ukraina satqınları olaraq tanılğan şahıslarnı devlet mukãfatlarından mahrum qaldırılması aqqında qanun leyhasını qabul etti.
Birinci oturuşuvda qanun leyhasına 341 deputat qol tuttı.
Hatırlatamız ki, QRM yuristleri bu yönelişte faal çalıştılar. Ukraina qaramanı unvan ve mukãfatı peyda olğanından berli o, 700 şahısqa, şu cümleden 9 qırım sakinine nail olundı.
Rusiye-ukrain cenki başlağanınen bu muim unvan sahipleri özlerini yahşı taraftan köstermediler. Böyle etip, Ukraina qaramanı Boris Deyç , 2013 senesi avgust 24-te mezkür unvanğa nail olsa, Qırım işğaline qol tuttı ve mart 16-sında 2014 senesi sahte ‘referendum’da iştirak etti. Ukraina qaramanı Fevzi Yakubov 2015 senesi qırımtatar gençlerini rusiye işğaline qarşı doğrultılğan tedbirlerde iştirak etmemege çağırdı. 2007 senesi Ukraina qaramanı unvanına nail olğan Nikolay Bagrov Qırım işğalini alğışladı ve Putinge yarımadanı alğanı içün minnetdarlıq bildirdi.
Adları añılğan ‘qaramanlar’artıq aramızda yoqlar, amma qırım sakinleri arasında bu unvannı alã daa taşığan, amma aynı zamanda ukrainler ve Ukrainanı yoq etmege yardım etken şahıslar bar. Ayrıca 2012 senesi Ukraina qaramanı unvanına nail olğan Aleksandr Batalin aqqında laf yürsetile. 2014 senesi iyün 12-den başlap Qırım Cumhuriyeti cemaat palatasınıñ azası ve ‘Bir Rusiye’ firqasınıñ azası oldı.
Böyle satqınlıq fikrimizce devletniñ eñ büyük mukãfatınen hiç uyğun degil. Faqat 2018 senesi Batalinge qarşı çıqarılğan sanktsıyalar cedvelinde unvandan mahrum qaldırmaq maddesi yoq edi.
Aynı zamanda Ukrainada ‘Sanktsıyalar aqqında’ Ukraina qanunı mucibi şahısnı oña qarşı sanktsıyalar sayesinde devlet mukãfatlarından mahrum qaldırmaq çaresi bar. Böyle etip, Nikolay Boykonı 2021 senesi bütün devlet mukãfatlarından mahrum qaldırdılar, faqat sanktsıyalar tek 3 yıl hüküm etecek. Demek ki, 2024 senesinden soñ o kene Ukraina qaramanı olacaq.
Elbette, böyle şey olamaz, şunıñ içün QRM öz muracatlarında Batalin ve Boykonı Ukraina qaramanı unvanlarından müddetsiz mahrum qaldırmağa teklif etti.