Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev Qırım işğaline muqavemet Künü munasebetinen keçirilgen matbuat konferentsıyasında şunı dedi ki, 2014 senesi fevral ayında Qırım işğali başlağanda Ukraina rus zulumına qarşı çıqmağa azır degil edi. Lãkin zamanlar deñişti.
Çıqışnıñ tolu metini
O vaqıt küreştik, şimdi yeñermiz!
Aynı böyle şiarnen öz çıqışımnı başlamağa ister edim.
2014 senesi fevral ayında Qırım işğali başlağanında rusiye zulumına qarşılıq köstermege azır degil edik: ne ukrain hakimiyeti, ne ukrain cemaatı, ne ukrain ordusı, ne Ukraina suverenitetiniñ kefil-ülkeleri, ne de halqara cemaatçılıq.
Biz vatandaşlıq cemaatı olaraq zorbalıqsız aktsıyalar keçire edik:
– Ukrain suverenitetini qorçalamaq içün meydanlarğa çıqtıq;
– Rusiye harbiy tehnikanıñ kirsetilmesine qarşılıq köstermek içün yollar boyu tizilip turdıq;
– Ukrain harbiy qısımlarnı rusiye terror ordusından qorçalamaq içün canlı zıncırlar yapıp turdıq;
– Ukrain ordusı içün aşayt mahsulatı ve turmuş eşyalarnı berdik;
– Harbiy qısımlarğa erkeklerimiz de, ukrain ordusınen birlikte topraqlarımıznı qorçalağanlarını teklif ettik;
– Muqavemet içün silãh bermelerini rica ettik;
– İşğalniñ başlağanından 8 ay devamında Ukraina devlet bayrağı qırımtatar Milliy Meclis binasınıñ töpesinde dalğalanıp tura edi. Soñra işğlacılar binanı kilitlediler.
Bütün bu vaqıt devamında Qırımdaki vatandaşlarımız taqip altında bulunmaqtalar: 284 siyasiy mahbüs ve cinaiy ‘davalar’ boyunca taqip etilgenler, olardan 195 qırımtatardır.
Şimdi yeñermiz, çünki ukrain cemaatı birleşken ve qarşılıq köstermege azırdır. Ukrain hükümetiniñ printsıpial mevamı bar, ukrain ordusı qaramancasına küreşmekte, halqara cemaatçılıq ise harbiy, siyasiy, diplomatik, iqtisadiy yardımda bulunmaqta.
Yazıq ki bugün, Qırım muqavemetiniñ 9-ıncı yılında bazı Ukraina devlet organları Ukraina qanunlarını bozmaqta.
Böyle etip, Ukraina Yuqarı Şurasınıñ insan haqları boyunca vekãletlisi Dmitriy Lubentsanıñ ofisi ‘Ukraina tamır halqları haqqında qanunnı’ bozaraq, Qırım boyunca insan haqları Vekãletlisiniñ temsilcisini tamır halqnıñ temsil organından fikrini sormadan tayin etti ve 2023 senesi 26 fevralde temsil organınen aqıl tanışmadan kütleviy şekilde tedbir keçirmege planlaştıra.
Maqamlı şahıslar tarafından böyle kibi areketler ve Ukraina qanunlarınıñ bozulması yer almamalı , çünki biz avropa misali huquqiy demokratik Ukraina oğrunda küreşmektemiz.