Salı künü, 2 mayısta, Qırımtatar Resurs Merkezi ‘TurBoTa o VPL’(‘ülke içinde yerini deñiştirgenlerge yardım’) çat-botnı taqdim etti. Mezkür bot ülke içinde yerini deñiştirmege mecbur olğan şahıslar içün, şü cümleden Ukraina tamır halqlar ve milliy azğınlıqlardan bütün kerekli malümatnı topladı.
Spikerler:
Eskender Bariyev – Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı ;
Koşelenko Konstantin – Ukraina içtimaiy siyaseti esap inkişafı, esap transformatsıya ve tsıfrovizatsıya Naziriniñ muavini;
İgor Lossovskiy- DESS reis muavini;
Tatyana Podvornãk- QRM kommunikastıya meneceri;
Matbuat-konferentsiya ketişatında qayd etilgeni kibi, al-azırda ÜİYD (VPL) meselesi aktual qalmaqta. Olarğa yañı şaraitlerge alışmağa yardım etmek pek mühimdir.
‘Yazıq ki, ÜİYD (VPL) sayısı kün-künden arta, çünki cenk devam etmekte. Öz yaşağan yerini terk etip, tanış olmağan yerge köçmege mecbur olğan her insan büyük stress ve bir sürü problemler yaşay, şü cümleden, yañı yerde öz menligini saqlamaq meselesinen rastkele. QRM böyle insanlarğa yardım etmek imkãnını taptı’,- qayd etti Eskender Bariyev.
Tatyana Podvornãk ‘TurBoTa o VPL’(‘ülke içinde yerini deñiştirgenlerge yardım’) çat-botnı taqdim etti ki, o, her biriniñ esas ihtiyaclarını qarşılamağa ve Ukraina tamır halqlar temsilcilerine öz menligini saqlamağa yardım etecek. Mezkür yardımcı nevbetteki bilgilerni taqdim etecek:
— VPL(ÜİYD) statusını nasıl etip almaq?
— yaşaycaq yerni qaydan tapmaq mümkün?
— yadikãrlıq binalarnı nasıl etip tapmaq?
— yañı işni nasıl tapmaq mümkün?
— gumanitar yardımnı nasıl almaq mümkün?
— belli ihtiyaclarğa köre mahsus tükãnlarnı nasıl tapmağa? (helãl, vegetarian)
‘Şimdilik çat-botumız 4 şeherni qaplam ala: Kiyev, Lvov, Çernovtsı, İvano-Frankovsk. Kelecekte ise daha keñiş territoriyağa yayınlanmağa ve daha çoq malümat yerleştirmege niyetimiz bar’, – qayd etti Podvornãk.
Konstantin Koşelenko qayd etkeni kibi, oñaytlı esap servislerniñ peyda etilmesi pek münimdir, çünki yañı şeherde mesafeli, tez şekilde alışmağa yardım ete.
‘Çat-bot messencerde olğanı da mühim, çünki yañı bir ilãveni qoşmağa aceti qalmay. Berilgen malümatnıñ mündericesi, keyfiyeti qıymetlidir. Qırımtatar Resurs Merkezi yañı şeherge köçmege mecbur olğanlar içün tevsiye, yardım menbası sayılır’- dep qoştı o.
İgor Lossovskiy aytqanı kibi, çat-bot ÜİYD içün mühim bilgilerni qaplap ala ve tamır halqlar ve milliy azğınlıqlarnıñ özgünligini saqlap qalmağa yardım ete. İgor bey QRM-ne emegi içün teşekkürler bildirdi.
Mezkür leyha QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Taqdimniñ mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.