Aqmescitteki SİZO hadimleri siyasiy mahbüs Nariman Celãlğa ihtiyacı olğan ilãclarnı bermeyler. Bu aqta mahbüsniñ ömür arqadaşı Leviza Celãlova ‘Qırım meselesi’ programmasında tarif etti.
Ekimler mahbüsniñ yanına barmağanlar. Tek yerleştirilgende formal şekilde baqıp çıqqanlar. Celãlov arqa ağırısından ilãclarını rica etkende, üstünden külip, hiç bir şey bermegenler.
‘Onıñ belarası üç grıjası bar. Ağırıları başladı. Her şeyni elinden alğanları içün, ilãc ve ağırıkesici melhemlerni bermelerini rica etse de, ricası red etildi. Bir şey bermediler’,- dedi o.
Belli olğanı kibi, Celãlov al-azırda umumiy kamerada bulunmaqta ve vaziyeti stabildir.
Faqat onen laf etkende, uzun vaqıt devamında tursa ya da otursa, ağırıları başlay’,- qoştı siyatsiy mahbüsniñ ömür arqadaşı.
Onıñ aytqanlarına köre, Celãlovnıñ arqası ağıra. Başqa yerge keçirilgen soñra yañı şaraitlerden dolayı alı fenalaşqandır: saba saat 6-dan aqşam saat 22-ge qadar yataqta oturmaq ve yatmaq yasaqtır.
‘Huquq cehetten elimizden kelgenini yapmağa tırışsaq ta, muracaat, şikãyet etsek te, her şey FHH(FSB) nezaretinde olğanını añlaymız. Yani tek FHH razılığı ile bir şeyler yapa bilemiz. Olar razılıq bermegence bir şeyler deñişir, degen ümütim yoq’,- qayd etti Leviza Celãlova.
Hatırlatamız ki, Nariman Celãlnı diversiya ve patlayısı şeylerni alıp, saqlağanında, olarnı sıñırdan keçirgeninde qabaatlap, 17 yılğa hapis, 700 biñ cöreme ve 1.5 yıl serbestligini sıñırlamasına mahküm ettiler.