Cumaaqşamı künü, 7 sentãbrde Kiyevde Qırımtatar Resurs Merkezi ve İgor Sikorskiy adında Kiyev politehnik institutı temsilcileriniñ körüşüvi olıp keçti. Tedbir devamında işbirlik haqqında añlaşma imzalandı.
Körüşüv devamında ocalarnı teşkilãt faaliyetiniñ yonelişlerinen tanış ettiler. İştirakçiler studentler ve ocalarnıñ QRM ofisi ile işbirligini muzakere ettiler. Ayrıca KPİ ve QRM esasında beraberlikte bir sıra tedbirlerni keçirmege teklif etildi.
Teşkilãtnen işbirlikte studentler öz nazariy bilgilerini amelde işlete bilirler, alışqanlıqlarını menimsey ve pekite bilirler. Şundan da ğayrı böyle işbirlik gençlerni Ukraina territorial bütünliginiñ tiklenilmesi oğrunda küreşke celp eter.
‘Çeşit zenaat sahipleri olacaq studetlerni Qırım, insan haqlarını qoruv, ukrain territoriyalarını işğalden qoruma kibi mevzularğa celp etmeli. Talebeler- devletimizniñ ümüdi ve mezkür meselelerni añlamaları pek mühimdir,’- qayd etti QRM reisi Eskender Bariyev.
Hatırlatamız ki, QRM bir qaç yıl devamında işğal etilgen Qırımdan Kiyevge köçmege mecbur olğan Tavriya milliy universiteti ve Milliy aviatıya universitetinen işbirlikte bulunmaqta. TMU ve MAU QRM tedbirlerinde faal iştirak etmekteler ve ğalebemizni yaqınlaştıralar.
İleride daha çoq!