2023 senesi 23 martta Qırımtatar Resurs Merkezi Ukraina MHMK(SNBO)ğa muracaat etip, Aleksandr Batalinniñ satqın faaliyetine diqqat ayırmaq ve unvanlarından, şu cümleden Ukraina Qahramanı unvanından mahrum qaldırmaqnı rica etti.
Eki haftadan ziyadesi keçti ve bu vaqıt içerisinde QRM yuristleri satqınlarnı Ukraina Qahramanı unvanından mahrum qaldırmaq meselesini yuridik cehetten işlediler: biz Ukraina devlet organlarına (Ukraina Prezidenti, Ukraina Nazirler Kabineti, Ukraina Havfsızlıq Hızmeti) muracaatta bulunıp, ‘Sanktsıyalar haqqında’ Ukraina Qanunına binaen devlet mukãfatlarından mahrum qaldırmaq şeklinde şahsiy sankstıyalarnı amelge keçirüv meselesini MHMK tarafından baqılması içün çıqarılmasını rica ettler.
Hatırlatamız ki, Aleksandr Batalin, 2012 senesi 24 avgustta Ukraina Qahramanı unvanına nail olunğan edi, amma işğalcı memuriyetnen faal işbirlikte bulunmaqta: 2014 senesi ‘Qırım Cumhuriyeti cemaat palatası’ ve ‘Bir Rusiye’ firqasınıñ azası oldı, onıñ rehberligi altında olğan ‘Fiolent’ zavodı ise rusiye istisalı içün belli bir mahsullar çıqarmaqta, yani ukrainlerniñ ölümine sebep ola demek mümkün.
Böyle satqın faaliyet, fikrimizce, Ukraina Qahramanı kibi yüksek unvanına hiç te lãyıq degil, faqat 2018 senesi Batalinge qarşı çıqarılğan sanktsıyalar cedvelinde devlet mukãfatlarından mahrum qaldırmaq kibi bir sanktsıya yoq eken.
Aynı zamanda Ukrainada ‘Sanktsıyalar haqqında’ Ukraina qanunına binaen devlet mukãfatlardan mahrum qaldırmaq şeklinde sanktsıyalarnı amelge keçirmekniñ usulı bar. Böyle etip, MHMK-niñ 2021.18 iyün qararı ile daha bir qırım satqını Nikolay Boyko Ukraina devlet mukãfatlarından mahrum qaldırıldı. Amma sanktsıyları tek 3 yılğa belgilengen, yani 2024 senesinden soñra o kene Ukraina Qahramanı olacaq.
Elbette, bu ola bilecek şey degil, şu sebepten de QRM öz muracaatlarında mezkür qararğa deñişmeler kirsetmege ve Batalin Aleksandr Sergeyeviç ve Boyko Nikolay Konstantinoviçni ömrülerniñ soñuna qadar devlet mukãfatlarından mahrum qaldırmaq teklif etti.
Devlet organlarınıñ tez cevap bereceklerine inanamız ve Qırım işğaline ve Ukrainada kerçekleştirilgen harbiy cinayetlerge alãqası olğanlarnı mesuliyetlikke çağırılması oğrunda çalışmağa devam etemiz!