2022 senesi 18 mayıs künü Qırımtatar Resurs Merkezi qırımtatar halqı sürgün etilgenine 79 sene tolğanı munasebetinen bütün Ukraina boyunca informatsıon-bord kampaniyasını başladı.
Bordlar ukrain cemaatına rusiye hakimiyetiniñ cinayetlerini numayış ete. Bütün dünya 1944 senesi qırımtatar sürgünini takbih etmegeninden yañı cinayetler yüz berdi. Şimdi RF ukrain halqına qarşı genotsid kerçekleştire.
Yazıq ki, 79 yıl keçkenine baqmadan vaqialar tekrarlanğanını köremiz. 2022 senesi 22 fevral künü moskva öz kerçek yüzüni kösterdi. RF Sovet Birliginiñ siyasetini devam etmekte, ukrain halqını, tili, medeniyeti, tarihı, ürf-adetlerini yoq etmege tırışa. RF kütleviy şekilde insanlarnı öldüre, qadınlarğa tecavuz köstere, balalarnı qaçıra, ukrainlerni Rusiye territoriyasına köçürip, evlerine dala, hırsızlıq yapa, aynı 1944 senesi sovet hakimiyeti yapqanı kibi.
Adetler deñişmey…
1944 senesi umumen Qırımda 238 500 adam köçürildi, olardan 46,2% elãk oldı. Bir çoq adam öz Vatanında yaşamaq imkãnından mahrum qaldı. Şimdi de RF Ukrainağa qarşı cenk başlağanını köremiz. Rusiye askerleri tarafından 8230 adam öldi. 1.9 milliondan ziyade ukrain sakini RF territoriyasına köçürildi. Çetelge 14 milliondan ziyade ukrain ketti.
Biz bunı toqtatmaq kerekmiz.
Fotoda Çerkassı, Gortomel, Nikolayev, Rovno kibi şeherlerde yerleştirilgen plakatlarnen tanış ola bilesiz. Bu bordlar sayesinde sakinler 1944 senesi faciası, bugünimizde de yüz bergen rf cinayetleri haqqında daha çoq bilecekler.
1944 senesi genotsid, aynı ukrain halqınıñ genotsidi kibi bütün dünya tarafından takbih etilmeli.
Bu plakatlar #LIBERATECRIMEA halqara areketiniñ faalleri tarafından işlenildi. Ukrain ressamı Andrey Yermolenkonıñ ustalığı sayesinde ise resim sıfatına malik oldılar.
#LIBERATECRIMEA kampaniyası QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Kampaniya mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.