Salı künü, 31 oktãbrde QRM Ukrainada ‘Fridrih Naumannıñ azatlıq oğrunda fondu’ Temsilciliginiñ destegi ile ‘Qırım istiqbali’ II Strategik Forumnıñ işini başladı.
QRM forumnıñ ekspert terkibiniñ kenişlenmesi üzerinde çalışmaqta ve yañı mutehassıslarnı qoşulmağa davet ete. Forumda Ukraina akademik saasınıñ temsilcileri, Qırım platforması Ekspert ağınıñ ekspertleri, cemaat erbapları, jurnalistler iştirak eteler. Alimler arasında doktor ve yuridik, coğrafiya, iqtisadiyat, siyaset, içtimaiy, tarihiy, pedagogika ilimler namzetleri bar.
QRM reisi, Qırımtatar Milliy Meclis azası Eskender Bariyev tedbir iştirakçlerini forumnıñ başlanmasınen hayırladı ve ileride yapılacaq işlernen tanış etti.
Strategik forumnıñ maqsadı – Ukraina akademik saasınıñ temsilcilerini Qırım deokkupatsıya ve reintegratsıyası esnaslarına celp etmek ve Ukraina hakimiyeti, Ukraina tarafdarları ve halqara teşkilãtlar içün tekliflerni işlep çıqarmaqtır.
II Strategik forumnıñ çerçivesinde ekspertler cenk vaziyetinde qabul olunğan Qırım boyunca huquq aktlarnı, I Strategik forum tarafından işlep çuqarılğan tevsiyelerniñ amelge keçirilmesini talil etecekler, Ukraina icra hakimiyetiniñ Merkeziy organları içün Qırımnıñ deokkupatsıyası ve reintegratsıyası boyunca yañı tekliflerni işlep çıqaracaqlar.
Birinci künü Ukrainada ‘Fridrih Naumannıñ azatlıq oğrunda fondu’ Temsilciligi leyhasınıñ meneceri İrina Starovitskaya forum iştirakçilerine mezkür fondnıñ faaliyeti haqqında tarif etti.
Boris Babin öz nevbetinde 2014 senesinden qabul etilgen Qırım boyunca qanunlarnıñ talilini taqdim etti. Ayrıca, ekspert şunı añlattı ki, 2014 senesi aprel ayından başlap 2023 senesine qadar ukrain parlamenti tarafından 20 yaqın Ukraina qanunı tasdiqlandı, esas Ukraina qanunlarnıñ deñiştirilmesi haqqında 90 qanun ve Ukraina ayrı saağa ait qanunlarnıñ deñişmesi haqqında 20 qanun tasdiqlandı.
Forum iştirakçileri professor Boris Babinnen birlikte 2023 senesi Qırımnıñ reintegratsıyası boyunca Ukraina qanuncılıqnıñ inkişafını muzakere ete ve hususiyetlerini talil ete bildiler.
