Qırımtatar resurs merkezi öz faaliyetini 8 yıldan berli devam etmekte. Bu devir içinde yerli, milliy ve halqara seviyede büyük iş yapıldı. Bütün küçümizni Qırımnıñ şiddetsiz deookupatsıya, reintegratsiya ve inkişafı, hem de Ukraina territorial bütünliginiñ tiklenmesine doğrultamız.
Cenk başlağanından berli faaliyetimizniñ yönelişini deñiştirmedik, çünki daima ülkemizniñ mustaqilligi içün küreşe edik. İşimizni daha da faalleştirdik.
Rusiye Ukrainağa qarşı cenk başlamazdan evel işğal etilgen Qırımda insan haqlarınıñ bozuvlarını qayd ete edik. 24 fevralden soñra añlaşıldı ki, işimizniñ dairesini kenişletmelimiz. Şu sebepten de insan haqlarınıñ bozuvlarını Herson ve Zaporojye vilãyetlerinde de qayd etmege başladıq. Bu faaliyetimiz pek mühimdir. Cinayetçilerni mesuliyetlikke çağırmaq içün resmiy delillerimiz olmalı.
Şundan da ğayrı, QRM insan haqlarınıñ bozuvları, harbiy cinayetler haqqında bilgilerni ve qaçaq ve yaşağan yerini terk etmege mecbur olğanlarnıñ malümatlarını mahsus işlep çıqarılğan sual cedveli yardımınen toplamağa devam ete.
Cenkten dolayı onlarnen faal cemaatçı öz yaşağan yerlerini terk etmege mecbur oldı. Olar hepisi 2014 senesinden berli adalet ve Ukrainanıñ territorial bütünligi oğrunda faal küreşe ediler. Ağır vaziyetke baqmadan bu adamlar küreşmege devam eteler, özleri de yardımğa muhtaclar. Şunıñ içün de QRM olarğa qol tutıp, gumanitar yardımda bulundı. Böyle etip, faallerimizniñ ruhunı kötermek, işlerini, yolunı devam etsinler, dep siltem bermege istedik.
Şundan da ğayrı, QRM taqımınıñ fikrine köre, böyle ağır zamanda bütün ukrain halqnıñ ruhunı ve birligini desteklemek pek mühimdir. Bu maqsat ile biz informatsıon kampaniyalarnı keçiremiz.
Cenk başlağanından berli 7 böyle informatsıon kampaniya keçirip, 2 millionğa yaqın adamnı celp ettik. Mezkür kampaniyalar çerçivesinde işğal etilgen Qırımdaki vaziyet, ülkemizniñ medeniy farqlılıqlarını añlattıq, tamır halqlarnıñ tarihınen tanış etmege tırıştıq.
Şundan da ğayrı, faaliyetimiz çerçivesinde bütün Ukraina boyunca bord kampaniyalarını keçiremiz. Plakatlarımız Kiyev, Lvov, Ternopol, Kropivnitskiy, Çernovtsı, İvano-Frankovsk, Lutsk, Rovno ve diger şeherlerde yerleştirildi.
QRM Qırımnıñ ekosistemasını tetqiq etmege devam ete. Meselã, Kiyevde QRM ekspertleriniñ ‘İşğal etilgen Qırımda ekologik- iklimiy diskriminatsıya: ölçüler ve telükeler’ adlı araştırmanıñ taqdimi keçirildi.
QRM taqımı dünya, şü cümleden rf-nıñ, tamır halqlarınen faal işler alıp barmaqta. Rusiyeniñ areketlerini taqbih etip, işğalcı devletke qarşı çıqqanlarını isteymiz.
Elbette, biz işğal etilgen Qırımdaki, yañı işğal etilgen Herson ve Zaporojye vilãyetlerindeki vaziyet haqqında halqara meydanlarda bahs etmege devam etemiz.
Şundan da ğayrı, işimizniñ mühim unsurlarından biri işğal etilgen Qırımda qanunsız seferberlikke qarşı küreşi oldı. ‘Mogilizatsıya’ (‘Cesedberlik’) kampaniyasını başlatıp, ordu hızmetine davetlerni alğanlarğa ne yapmaq kerekligini, işğal etilgen territoriyalardan nasıl etip çıqmanı, seferberlikten qaçınmaqnı añlattıq.
‘Adlarnı qaytarmaq-Qırımnı qaytarmaq’ informatsıon- advokatsıon kampaniyasına da çoq emek bermektemiz. Mezkür kampaniya yardımınen tarihiy toponimlerniñ qaytarılması ne qadar mühim olğanını, deokkupatsıyanıñ bir aleti olğanını añlatamız.
Şunı da hatırlatmaq kerek ki, Ukrainadaki cenk ta 2014 senesi, yani Rusiye Qırımnı işğal etkeninde başladı. 8 yıldan berli qarşılıq köstermektemiz. Ğalebemiz Ukrainanıñ territorial bütünliginiñ tiklenilmesinen yekünlenmeli. Qırımda başladı..Qırımda da bitecek!
