Qırımtatar Resurs Merkezi Ukraina ve bütün dünyanı işğal etilgen Qırımda insan haqlarını bozğanlarğa qarşı şahsiy sanktsıyalar kirsetmege çağıra. QRM taqımı munasip cedvellerni Ukraina çetel işler Nazirligine, Ukraina Prezidenti ofisine, Ukraina havfsızlıq hızmetine, şundan da ğayrı, AQŞ, Büyük Britaniya, Kanada, Estoniya, Latviya, Litva ve AB ülkelerniñ elçiliklerine yolladı.
Qayd etmege ister edik ki, rusiye federatsiyasınıñ areketleri, Qırım işğalinden başlayaraq, cinayet sayılır ve halqara huquqnı boza.
Faqat halã daha AB-niñ Qırımğa nisbeten sanktsıyaları işğal etilgen yarımadada insan haqlarını bozğanlarğa dair degil de, tek ukrain suvereniteti ve territorial bütünliginiñ bozğanlarğa qarşı amelge keçirile. Demek ki, hakimler, tetqiqatçılar, prokuror, FHH(FSB) hadimleri ve silãhlı küçler cezasız qalmaqtalar.
Hatırlatamız ki, Qırımtatar Resurs Merkezi Qırımda insan haqlarını bozğan şahıslarğa nisbeten sanktsıyalar kirsetmek maqsadınen Magnitskiy Aktı misalinde qanunlarnıñ qabul olunması oğrunda çalışmaqta. Teşkilãtımız tarafından vaqtınca işğal etilgen territoriyalarda işğalcı RF memuriyetinen işbirlik yapqan şahıslarğa nisbeten şahsiy sankstıyalar kirsetmek kerekligine qıymet kesüv usuliyeti işlep çıqarılğan edi.
Mezkür usuliyet esasında QRM ekspertleri işğal etilgen Qırımda insan haqlarını bozğan 166 adamdan ibaret cedvelni taqdim etken ediler. Şundan da ğayrı, siyasiy mahbüs, olarnıñ tuvğanları ve Qırım faalleleriniñ taqibine alãqası olğanlarnıñ tasnifi taqdim etilgen edi.
FHH (FSB) hadimleri
İİN (MVD) hadimleri
Prokuratura hadimleri
Hakimler
Mahkeme kãtipleri
Ekspertler, ekimler
FSİN hadimleri
Tayin etüv boyunca advokatlar
Diger hızmet vekilleri (nazirlik, FVN, tetqiq ve il.)
İşğal etilgen Qırımda insan haqlarınıñ bozulmasına ait olğan şahıslar cedvelinen saytımızdaki diagrammadan tafsilãtlıca tanış olmaq mümkün.
2021 senesi sentãbr ayında Qırımtatar Resurs Merkezi İşğal etilgen Qırımda insan haqlarınıñ bozulması içün mesüliyetli olğan 50 adamdan ibaret cedvelni Ukraina çetel işler Nazirligine, Ukraina Prezidenti Ofisi, Ukraina Havfsızlıq Hızmeti, AQŞ, Büyük Britaniya, Kanada, Estoniya, Latviya ve AB ülkelerniñ elçiligine yolladı.