Salı künü, iyül 30-da, QRM AQŞ Devlet departamentiniñ temsilcilerinen körüşti. QRM ekspertleri işğal etilgen Qırımda insan haqları bozuvlarınen bağlı vaziyet haqqında añlattılar, işğal etilgen Qırımdaki vaziyetke dair nevbetteli esabatlar yapılmasınen bağlı tevsiyelerni taqdim ettiler.
Ayrıca körüşüvde AQŞ Devlet departamentiniñ temsilcileri Dip Kaur, Maykl A. Orona, Sidney Franklin, Nataşa Gloger, QRM reisi, qırımtatar Milliy Meclisi azası Eskender Bariyev, QRM meneceri Zarema Bariyeva, QRM yuristi Lüdmila Korotkih ve kommunikatsıya meneceri Tatyana Savçuk iştirak ettiler.
QRM temsilcileri işğal etilgen Qırımda insan haqları bozuvlarınen vaziyetini, ukraintaraflı faal cemaatçılar ve qırımtatar halqınıñ temsilcilerine dair sistemli repressiyalar haqqında añlattı. QRM reisi Eskender Bariyev işğal etilgen Qırımda ve Zaporojye, Herson vilãyetlerinde insan haqları bozuvlarınıñ esas tendentsıyalarından bahs etti ve BMT(OON) Halqara mahkeme qararından soñra işğalcılar tamır halqqa qarşı repressiyalarını arttırğanlarını qayd etti.
‘2024 senesi 1 yarımyıllıq içinde Qırımda keçken senege baqqanda daha çoq tintüv keçirildi. Bunı BMT(OON) Halqara mahkemesiniñ hükmünden soñra işğalcılar tintüv, tutuqlamalarını daha faal keçirmege başladılar, em de eñ-evelã Qurultay ve Mecliske alãqası olğanlarğa dair’,- dedi o.
Qırımda qırımtatarlarnı ve ukrainlerni ‘Hizb ut-Tahrir’, Noman Çelebicihan adına batalyon, ‘devletke qarşı hayinlik’, ‘casuslıq’, ‘rf ordusınıñ diskriminatsıyası’ kibi sebeplerden dolayı tutuqlamağa devam eteler.
Şundan da ğayrı işğalcılar tarafından kerçekleştirilgen cinayetler haqqında sessizlik de yüz bermekte.
‘İşğalcılar tintüvlerni geceleri keçirip, adamlarnı alıp, tuvğanları sussa, adamnı keri qaytaracaqlarını aytalar. Elbette, bu kibi laflarğa inanılmaz. Misal olaraq, İsmal Şemşedinovnıñ vaziyeti.Tuvğanları başta susqan ediler, amma soñra, ana-babaları ve yaqınları onı qıdırmağa başlap, rusiye işğalcı muessiselerine barğanda, kimse öyle adamnı tanımağanı ve zaten tintüv, sorğu, tutuqlama keçirilmegeni bildirildi’,- añlattı Eskender Bariyev.
QRM ekspertleri işğal etilgen Ukraina territoriyalarındaki erkeklerni rusiye ordusına qanunsız şekilde seferberlikke alğanlarını da tarif ettiler. Qırımtatarlarnıñ büyük qısmı rusiye-ukrain cenkinde Rusiye tarafından iştirak etmemek içün Qırımnı terk etmege mecbur olğanları da qayd etildi.
Subetdeşler ileride işğal etilgen Qırımda, Zaporojye ve Herson vilãyetlerinde insan haqları bozuvlarını qayd etilüvi boyunca işbirlik haqqında añlaştılar.