Cuma künü, 8 sentãbrde QRM reisi Eskender Bariyev Qırım MC idariy- bölge qurulışınıñ muzakere etilmesinde iştirak etti. Tedbir Ukraina cemiyet, territoriya ve infrastrukturasınıñ inkişaf Nazirligi tarafından teşkil etilgen edi.
Hatırlatamız ki, Ukraina Prezidenti Vladimir Zelenskiy ‘Qırım Muhtar Cumhuriyetiniñ idariy- bölge qurulışına dair bazı meselelerniñ çezilmesinen bağlı bazı Ukraina qanuniy maddelerine deñişmeler kirsetilmesi haqqında’ qanunnı imzaladı. Mezkür qanun mücibi Qırım yarımadasında 74 coğrafik ad deñiştirildi.
Muzakere çerçivesinde 2016-2020 seneleri müddet içinde Qırım MC idariy-bölge qurulışına dair qararlarnıñ amelge keçirilmesinen ve Qırım Muhtar Cumhuriyetiniñ yañı rayonlarğa bölünmesinen bağlı meseleler, şundan da ğayrı territorial cemiyet sayısınen bağlı meseleler muzakere etildi.
Eskender Bariyev qayd etkeni kibi, taqdim etilgen haritada 10 rayonda dekomunizatsıya esnası belgilenmedi.
‘Misal olaraq, Pervomayskoye rayonına kelgende, Pervomayskoye- komunistik bir unsur. Dekomunizatsıya qanunına köre ise deñişmeler kirsetilip, tarihiy- Curçi adı qaytarılğan edi’,- añlattı o.
Şundan da ğayrı, ekspert Aqyar şeheriniñ sıñırları pek aydın qayd etilgenine diqqatnı çekti, çünki Aqyar şeher şurasınıñ mesken yerleri şimdi çeşit rayonlarğa, ekseriyetnen de Bağçasaray rayonına kirsetilgen. Demek, Aqyar şeherniñ sıñırlarına dair mesele açıq qalmaqta.
‘Territorial toplulıqlarğa kelgende ise, şimdilik 40 territorial toplulıq belgilendi. Fikrimce böyle vaziyette territorial topluluqlar sayısını arttırmaq mümkün edi, faqat bu umumiy bir muzakere olğanı içün, biz- qırımtatar Milliy Meclisi ve Qırımtatar Resurs Merkezi – mezkür teklifler üzerinde daha çalışıp, öz tevsiyelerimizni kirsetirmiz’,- qoştı o.