Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev FREEДОМ telekanalına intervyu bergende beyan etti ki, Qırımda putinniñ seferberligi devam etkeni içün Rusiye tarafından işğal etilgen yarımadağa qaytmağa daha havflı.
Onıñ aytqanına köre, qırımtatarlar toplu yaşağan yerlerde seferberliknen bağlı israrlı ziyaretler olıp keçmekte. İşğalcılar böyle reydlerni Qarasuvbazar rayonında keçirdiler.
‘Kireler, araba qapılarnı sındıra bileler. Adamlarnı sorğuğa çekeler: qaç adam, nasıl tehnika mevcut, evniñ içinde neler olğanını soraylar. Soñra qomşulardan da bilgi alalar. Diger şahıslar, ellerinde cedveller ile ziyaret eteler. O cedvelniñ serlevası- ‘RF ordusında hızmetinden qaçınğanlar’. Qıdırılğan qırımtatarlarnıñ cedveli’,- añlattı QRM reisi.
Demek ki, seferberlik ve orduda hızmet ete bileceklerni qıdıruvlar devam etkenini añlamaq mümkün.
‘Biz adamlarnı haberdar etmege tırışamız. Qarasuvbazarda böyle cedvel olsa, başqa yerlerde ola bilir. Eñ azından, Aqmescit, Bağçasaray, yani qırımtatarlar toplu yaşağan yerlerde mıtlaq ola bilir,’- dedi Eskender Bariyev.