QRM öz derclerinde Qırım mesken yerleri, suv anbarları, demiryol stantsıyalarnıñ adlarını qaytarılmasına defalarca diqqat çekken edi. Faqat soqaq ve meydanlarnıñ adlarınen bağlı mevzu da ayrı diqqatqa lãyıqtır.
Bu mesele ne içün emiyetli?
Asılında, soqaq ve meydan adları, diger toponimler kibi timsal mananı taşıy, tarihiy hafızanıñ saqlanılması ve özgünliginiñ şekillenmesine tesir ete. Misal olaraq, Moskva soqağında ösip çıqqan adamnıñ ve Aziz Yüzniñ Qaramanları soqağında öskenniñ dünya baqışlarını bir qıyas etip baqıñız. Bu küçük körüngen unsurnıñ emiyeti olduqça büyüktir.
Şunıñ içün QRM şimdiden soqaq ve meydanlarnıñ tarihiy adlarını qaytarmaq ve bu işte abunecilerimizge bu teşşebüske qol tutmağa teklif ete.
Ayrıca Aqmescitteki merkeziy meydanlardan biri- Sovet meydanı ve Yekaterina soqağınıñ adlarını deñiştirmege teklif etemiz.
Tekliflerimiz:
1. Sovet meydanını Pötr Grigorenko adına meydan olaraq adlandırmaq
2.Yekaterina soqağını Grigoriy Skovoroda adına soqaq, dep adlandırmaq.
Dostlar, teşebbüsimizge qol tutasızmı? Şimdiden azırlanmaq kerek, işğalden azat etilgende vaqıt çoymayıq.
Tarihiy izaat:
Pötr Grigorenko- ukrain sovet huquqqoruyıcısı, dissident, general-mayor. Moskva ve Ukrain Helsinki birleşmeniñ tesisçilerinden biri. Qırımtatar ve diger sürgün etilgen halqlarnıñ tarafını tuta edi. 1964 senesi huquqqoruyıcı faaliyeti içün bütün devlet mukãfatlarından mahrum qaldırıldı. Sovet hapishanelerinde, lagerlerde oldı. ‘Qırımtatarlar içün Pötr Grigorenko qadar kimse yapmağandır. Onıñ bir sıra intervyu, beyanat, matbuat konferentsiyaları sayesinde qırımtatar haqqında Sovet Birligi tışında bildiler’,- hatırlay Mustafa Cemilev. 1999 senesi Aqmescitte qırımtatarlarnıñ teşebbüsi ile Pötr Grigprenkoğa eykel tiklenilgen edi, amma meydanğa onıñ adı berilmesine ruhset öyle de berilmedi.
Grigoriy Skovoroda- qırımtatar tamırları olğan belli ukrain filosofı. Şahin Gireyniñ nesiline ait.
Mezkür kampaniya QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Kampaniya mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.