Bazarertesi künü, 13 fevralde QRM ‘Ukrinform’ informatsıon agentliginde ‘Adlarnı qaytarmaq- Qırımnı qaytarmaqtır’ adlı matbuat konferentsıyasını keçirdi. Tedbir devamında spikerler Qırımda tarhiy toponimler qaytarılmasınıñ mühimligi haqqında bahs ettiler.
Spikerler:
- Eskender Bariyev – Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı;
- Tatyana Podvornãk- QRM kommunikatsıya meneceri;
- Refat Çubarov- Qırımtatar milliy Meclis reisi;
- Viktor Yelenskiy- etnosiyaset ve vicdan serbestligi boyunca Devlet hızmetiniñ reisi;
- Andrey Yermolenko – ressam- karikaturcı.
‘Soñ üç asır devamında Qırım yarımadası rusifikatsıya ve sovetizatsıya altında olğan edi ki, bu da coğrafik adlarnıñ deñiştirilmesinde açıq-aydın akis olmaqta. Eñ evelã rusiye hakimiyeti çeşit devirlerde Ukraina tamır halqları – qırımtatar, qaraim, qırımçaqlarnıñ til, tarih, medeniyetini yoq etmege ve olarnı tuvğan topraqlarından üzmege tırışa edi’,- qayd etti Tatyana Podvornãk.
Kommunikatsıya meneceri qayd etkeni kibi, bugünde bugün Qırımnıñ tarihiy toponimikasınıñ tiklenmesi pek mühimdir. Şu sebepten de QRM ve qırımtatar Milliy Meclisi yañı ‘Adlarnı qaytarmaq-Qırımnı qaytarmaqtır’ serlevalı informatsıon kampaniyasını başlattı.
Eskender Bariyev Qırım tarihiy adları ne vaqıt deñiştirilgeni ve Rusiye toponimikanı informatsıon cenkinde nasıl işletkeni haqqında bahs etti.
‘Şimdiki devirde Qırım tarihiy toponimikasınıñ qaytarılması tek adaletni tiklemek degil de, yarımadanı işğalden qurtarmaq içün aletlerden biridir’, – qayd etti o.
Qırımtatar Milliy meclis reisi Refat Çubarov mezkür mevzu ne qadar mühim olğanını qayd etip, Qırımda tarihiy toponimlerniñ yañıdan tiklenilmesi Ukraina tamır halqları ve Ukraina devleti için emiyetligini añlattı.
‘Rusiye imperiyası, soñra sssr tarafından amelge keçirilgen kolonial siyasetine binaen yoq etüvge oğratılğan Qırım tarihiy toponimiyasınıñ yañıdan tiklenilmesi Moskvanı yat territoriyalarda öz ‘maneviy degerliklerni’ qıdırmaqtan vazgeçtirir’,- qayd etti Çubarov.
Etnosiyaset ve vicdan serbestligi boyunca Devlet hızmetiniñ reisi Viktor Yelenskiy tarihiy adaletniñ yañıdan tiklenilmesi mıtlaq tamır halqlar içün ayrıca mühim olğanını qayd etti.
‘Kuybeşovo – İsar, Suvorovo – Üç Cılğa, Krasnoperekopsk – Yañı Qapı olğan vaqıtta tamır halqqa nisbeten adalet aqiqaten de tiklenilecek ve Qırım tam manada işğalden azat olacaq’,- qayd etti Yelenskiy.
Tedbirge ressam Andrey Yermolenko qoşuldı. O, bütün bu vaqıt devamında #LIBERATECRIMEA faalleriniñ ğayelerini acayip resimlerde amelge keçirmege yardım ete edi.
‘Tam ğalebemiz içün Qırımdaki adlarnıñ qaytarılması haqqında bahs etmek pek mühimdir. Biz ayaqta tura bildik, endi yeñmek kerekmiz, Qırım Ukrainağa qaytqan vaqıtta biz ğalebe qazanacaqmız!’- qoştı o.
Hatırlatamız ki, QRM ve qırımtatar Milliy Meclisi Qırımnıñ tarihiy adlarınıñ qaytarılmasına doğrultılğan yañı ‘Adlarnı qaytarmaq-Qırımnı qaytarmaqtır’ serlevalı informtasıon kampaniyasını başlattı.
Kampaniya ‘Tiklenüv’ halqara fondunıñ destegi ile kerçekleştirile.