2026 senesiniñ ilk yaz ayınıñ 9-nda qanunsız cezasını çekken Qırım siyasiy mabüsi Yevğen Jukov azatlıqqa çıqtı. Bu aqqında “Yeğova Şaatları” saytında haber etile.
Qırımtatar Resurs Merkezi Yevgeniyniñ tuvğanları ve yaqınlarına qaytqanını hayırlay ve yıllarnen devam etken adaletsiz apis cezasından soñ tezce yahşı olmasını, sağlığını, qoranta sıcağı ve barışıqlı yaşayışını tiley.
Hatırlatamız: Yevgeniy Jukov 2020 senesiniñ orta küz ayında işğal etilgen Qırımda Yeğova Şaatlarınıñ taqip etilüvi çerçivesinde tutulğan edi. 2022 senesi orta küz ayında işğal makemesi onı “ekstremist teşkilâtınıñ faaliyetini teşkil etüv”de qabaatlap, altı yılğa apishanege aldı. Aslında o, dört yarım yıl apishanede yattı.
İnsanlarnı diniy işançları içün taqip etüv – vicdan ve din serbestligi aqqınıñ qaba bozuluvıdır. QRM halqara toplulıqnı rusiyege siyasiy sebeplerden yapılğan taqiplerni toqtatmaq ve qanunsız tutulğan Qırım siyasiy mabüslerini ve Ukrayinanıñ diger grajdanlarını azat etmek içün basqı quvetleştirmege çağıra.