Dostlar, ‘Qırım istiqbali’ II Strategik forumnıñ mahsulını diqqatıñızğa taqdim etemiz: ‘Qırım reintegratsıyası: hükümet planları ve halqara destek usullarınıñ şekillenmesi’.
Hatırlatamız ki, 2023 senesi 31 oktãbrden 5 noyabrge qadar QRM Ukrainada ‘Fridrih Naumannıñ azatlıq oğrunda fondu’ Temsilciliginiñ destegi ile ‘Qırım istiqbali’ II Strategik forumnı keçirgen edi.
Tedbirde 20 tecribeli eksepert, aralarında ise Ukraina Akademik sahasınıñ temsilcileri, Qırım Platforması Ekspert ağınıñ ekspertleri, cemaat erbapları, jurnalistler, alimler, yuridik, coğrafik, iqtisadiyat, siyaset, içtimaiy, tarihiy, pedagogika ilimleri iştirak eteler.
Neticede ile ‘Qırım istiqbali’ II Strategik forumnıñ ekspertleri ‘Qırım reintegratsıyası: hükümet planları ve halqara destek usullarınıñ şekillenmesi’ adlı vesiqanı işlep çıqardılar.
Mezkür vesiqa Qırım Muhtar Cumhuriyeti ve Aqyar şeheriniñ işğal etilgen territoriyalarınıñ deokkupatsıya ve reintegratsıya Strategiyasını amelge keçirüv boyunca tedbirler Planına tevsiyelerden, 2023 senesi Qırım reintegratsıyası boyunca Ukraina qanunları inkişafınıñ talili, Ukrainanıñ yañıdan tiklenilmesi içün halqara maddiy yardım usullarını işlep çıqarılmasına dair tekliflerden ibarettir.
Vesiqa Ukrainada ‘Fridrih Naumannıñ azatlıq oğrunda fondu’ Temsilciliginiñ destegi ile neşir etildi. Bölüklerde taqdim etilgen bilgiler içün muellifler mesuliyetlidir. Talil ve tekliflerniñ mündericesi ‘Fridrih Naumannıñ azatlıq oğrunda fondu’ Temsilciliginiñ noqtainazarlarını aks etmey bilir.