Çarşenbe künü, 15 martta qırımtatar Milliy Meclis ofisinde Ukrainada BMT(OON) Monitoring Missiyasınıñ temsilcilerinen toplaşuv keçirildi.
Körüşüvde Ukrainada BMT(OON) Monitoring Missiyası reisiniñ muavini Noel Kalhun hanım, Missiya hadimleri Diarmud Kunniff bey, Mariya Bilak hanım, Vitaliy Hilko efendi, qırımtatar Milliy Meclis reisi Refat Çubarov, Meclis reisiniñ muavini, halq deputatı Ahtem Çiygöz, Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev ve Meclis azası Riza Şevkiyev iştirak ettiler.
Körüşüvde Eskender Bariyev hatırlattı ki, QRM teşkilãtnıñ saytında insan haqlarınıñ bozuluvı haqqında sistemli ve tolu malümat tapmaq mümkün, ayrıca azatlıqtan mahrum qaldırılğan yerlerde bulunğan insanlar haqqında ve Qırımda insan haqlarını bozğanlar haqqında.
‘Missiyanıñ rolü pek büyük, çünki BMT Baş Assambleyası rezolütsıyası ve Baş kãtipniñ maruzalarına kirsetilgen malümatlar ve monitoring sayesinde Ukrainağa qol tutqan ülkelerniñ sayısı artıp turmaqta’,- qayd etti Bariyev.
Ekspertniñ daha qayd etkenine köre, maruzalarda tek insan haqlarınıñ bozuvlarını degil de, rf tarafından kerçekleştirilgen harbiy cinayetlerni közde tutmalı. Çünki taqip etilgen ve azattan mahrum qaldırılğan, yani harbiy esirler ve siyasiy mahbüslerden ğayrı hiç bir qabaatsız, mahkemesiz tutuqlanğanlar da bar.
Körüşüv devamında Bariyev Monitoring missiyasına ülkelerniñ diplomatlarını ve halqara advokatlarnı siyasiy mahbüslerniñ dava işlerine celp etmege teklif etti.