Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev ‘Qırım.Aqiqat’ portalına intervyu bergen vaqıtta işğal etilgen Qırımda kurort mevsiminen bağlı vaziyetni izaatladı.
Bariyev qayd etkeni kibi, QRM işğal etilgen yarımadasınıñ sıñırına yaqın territoriyalarını da talil ete. Onıñ aytqanına köre, Geniçesk rayonında da bu yaz turist pek az.
‘Misal olaraq, Geniçesk rayonını alsaq – Strelkovoye, Geniçesk şeheri, Gengorka, Sçastlivtsevo. Bu kurort yerlerine yaqın rayonlarda yaşağanlar kele edi. Cenkten dolayı işğal etilgen territoriyalarğa kimse kelmey, onıñ içün de mında adam yoq’,- añlattı o.
Bariyevniñ qayd etkenine köre, kurort mevsimi olmağanı sebebinden musafirhane, rahatlıq bazalarnıñ sahiplerinden ğayrı, turistlerge öz mahsulatını satqan çiftçiler de bayağı zarar kördiler.
‘Bugünde bugün işğal etilgen Qırımda keçken senege baqqanda bile adam pek az. Bazı musafirhaneler bom-boş tura. Şimdi yaznıñ ortası, turistler ise yoq. Rusiyeliler Qırımğa kelmege saqınalar’, – dep qoştı Bariyev.