Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev UA SOUTH intervyu bergende işğal etilgen Qırımda kimler hain sayılğanı haqqında hikãye etti.
‘Asılında, işğal etilgen territoriyalarda bulunan bütün adamlar hain sayılır, amma hainlikniñ seviyesini közde tutmalı. Memur adamı ya da Ukrainağa hızmet etmege ant etken, amma işğalcınıñ tarafına keçken askerni ve Gippokrat antını bergen ve ukrainlerge yardım etmege devam etken ekimni qıyas etmege mümkün degil. Nasıl qıymet kesmeli? Şimdi bu sual açıq qalmaqta. Bu munasebet ile QRM insanlarnıñ hainlik seviyesini ölçemege yardım etken usuliyetni işlep çıqardı. Böyle tasnif ukrain devlet organları ve halqara teşkilãtlar içün sanktsıya siyasetiniñ mühim aleti ola bilir’,- dedi QRM reisi.
QRM reisiniñ fikrine köre hainlik şekline qıymet kesmek yollarından biri bir de bir şahısqa dair bir sıra mesuliyetlik indikatorlarnıñ qullanılması sayılır. Böyle indikatorlar toplamı şu şahısnı sanktsıya cedveline kirsetmek zaruriyetine işaret etmeli.