Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev ‘Qırım.Aqiqat’ portalına intervyu vaqtında Havfsızlıq keñeşiniñ toplaşuvını izaat eterek, diplomatik cehetten bu tedbir pek mühim olğanını qayd etti.
‘Diplomatik cehetten pek mühimdir. Böyle etip, Rusiye bir telüke olğanı ve bütün medeniy dünya bu kibi telükelerge qarşılıq köstermek ya da aldını almaq kerekligi kösterile. Şunıñ içün tarih kontekstinde ve diplomatik cehetten doğru bir adımdır. Bütün dünya ve eñ-evelã Rusiye içün ciddiy bir hatırlatma’,- dedi o.
Hatırlatamız ki, 31 yanvar künü Nyu-Yorkta AQŞ teşebbüsi ile OON Havfsızlıq keñeşiniñ toplaşuvı keçirldi. Tedbirde Ukraina sıñırlarınen bağlı vaziyet ve RF istilã tahmini muzakere etildi.