Çarşenbe künü, dekabrniñ 1-inde QRM ‘Maña babamnı qaytarıñız!’ adlı vesiqalı filmni Norvegiyada taqdim etti. QRM temsilcileri Norvegiya Qırallığında Ukraina Elçiligi ve Norvegiya Helsinki komitetinen teşkil etilgen tedbir çerçivesinde işğal etilgen Qırımda insan haqları haqqında muzakerede iştirak ettiler.
Hatırlatamız ki, mezkür film ile QRM ukrain ve halqara cemaatçılıqnıñ diqqatını Qırım siyasiy mahbüsleri, olarnıñ balalarınıñ meselesine çekmek istey. Şu sebepten de film 7 tilde taqdim etildi: ukrain, arap, alman, ingliz, türk, italyan, ispan. ‘Maña babamnı qaytarıñız!’ filmi çetelde- Norvegiyada ilk sefer taqdim etildi.
Film numayış etilgen soñra, işğal etilgen Qırımda insan haqlarınen bağlı vaziyet muzakeer etildi. Spikerler RF-nıñ yarımadada cinayetli areketleri haqqında hikãye etip, Norvegiya kibi ğarbiy devletler Qırımda insan haqlarını qorumasında nasıl yardım ete bilecegini añlattılar.
Munaqaşada QRM meneceri Zarema Bariyeva iştirak etti. O halqara cemaatçılıqqa Qırımda bala haqları bozulğanı haqqında añlattı. Aytqanına köre, Qırım işğalinden soñra siyasiy mahbüslerniñ, belgisiz ğayip olğan, elãk olğanlarnıñ balaları azap çektiler.
Bariyeva yaqında Qırımda 14 yaşındaki Meryem Kulametova, 16 yaşındaki Amar Abdulgaziyev, 17 yaşındaki Safiye Yakubovağa nisbeten işğal etilgen hakimiyet tarafından yapılğan qanunsız areketler haqqında añlattı.
QRM meneceri halqara cemaatçılıqnı Qırımda qırımtatarlarnıñ haqları nasıl bozulğanından bahs etti.
‘Öz çıqışımda Rusiye qırımtatarlarnıñ temsil organı Milliy Meclisni ne sebepten yasaq etkenini, tamır halqınıñ temsilcilerini dünya içün havflı terrorist olaraq sayğanını añlattım’,- qoştı o.
QRM taqımı filmden ğayrı, ‘Qırım mahbüslerine yardım et’ adlı rolikni taqdim etti ve bütün deputatlarnı QRM tarafından başlatılğan ‘Atalıq’ kampaniyasına qoşulıp, mahbüsler ve olarnıñ qorantalarını öz siyasiy imayeleri altına almağa davet etti.
Bariyevanıñ teklifleri:
-ekspert-iştirakçilerge Qırım platformasınıñ Ekspert Ağına qoşulmaq ve bilgilerini çeşit sahalarında işletmek;
– Norvegiya ekspertlerine QRM teşebbüsinen keçirilgen Ukrain- Norvegiya halqara işbirlik forumında iştirak etmek.
‘Bütün iştirakçilerni öz ğayretlerini birleştirip, insan haqları bozuvlarını, ayrıca da tamır halqqa nisbeten repressiyalarnı toqtatmaq, Kreml mahbüslerini azat etmek, halqara huquqqa riayet etmek maqsadınen RF-na basqını arttırmağa çağıram’,- yekünledi o.
