Cumaaqşamı künü, 16 dekabrde, Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev Italiya Parlamenti deputatlar Palatasında işğal etilgen Qırımda vaziyet ve insan haqlarınıñ bozuvları haqqında maruzasınen çıqışta bulundı. Ekspert RF cinayetli areketlerine qarşılıq usulları haqqında laf yürsetti.
‘Rusiye bütündünya işğalçı sayılıp, bütün insaniyetlikke havflı ola bilir. Qırım işğali, devamında ise faal militarizatsıyası Rusiye Ukrainadan ğayrı, Avropa ve Qaradeñiz havuzı ülkeleri içün telükeli olğanını tasdiqlay’,- qayd etti Bariyev.
QRM bildirgenine köre, 2021 senesi 11 ay içinde Rusiye yarımada territoriyasında 37 arbiy talim keçirdi, mezkür tedbirlerde 46850 asker, 2900 ziyade mahsus tehnika işletildi.
Bariyev qırımtatar halqına qarşı repressiyalar haqqında añlattı. Sürgünlik neticesinde qırımtatar halqı öz Vatanında azlıq olıp qaldı. Ekspert Qırımda soñ tendentsıyalarnı qayd etti:
– haber berilmegeni sebebinden tintüvler;
– Mahkeme toplaşuvına siyasiy mahbüslerni desteklemege kelgen faal cemaatçılarnıñ yaqalaması;
– Siyasiy mahbüslerniñ ailelerini taqip etüv;
– Rusiye qanuncılıqnıñ sertleştirilmesi ve ukrain vatandaşlarını taqip etüvinde işletilmesi;
– Qırım siyasiy mahbüslerini uzun müddet hapiske mahküm etilmesi;
– Kerekli tib yardımı kösterilmemesi, siyasiy mahbüslerniñ sağlıqları fenalaşqası, mahbüslerge ve faal cemaatçılarğa qarşı fizik ve maneviy basqı kösterilmesi.
Milliy Meclis azası halqara cemaatçılıqnı, QRM malümatlarına binaen, yarımadada 234 siyasiy mahbüs qayd etilingeni, olardan 165 qırımtatar olğanından haberdar etti.
‘RF şiddetini ve devam etken repressiyalarnı toqtatmaq yollarından biri- sanktsıyalardır, ayrıca da şahsiy sanktsıyalar. Al-azırda QRM tarafından insan haqlarını bozğan 166 adamdan ibaret cedvel hazırlanıldı. 50 adamdan ibaret cedvel Magnitskiy Aktı misalinde qanunları olğan devletlerge ve Avropa Birligine yollanıldı. Eñ yaqın zamanda İtalyada da Magnitskiy Aktı misalinde qanun peyda olacağına ümüt etemiz’,-qayd etti Bariyev.
Şundan da ğayrı, deputatlar içün ‘Maña babamnı qaytarıñız’ vesiqalı filmniñ bir qısmı italyan tilinde numayış etildi.